Buǵan deıin 5 ret isti bolǵan kúdikti qonaǵyn pyshaqtap óltirgen

TALDYQORǴAN. QazAqparat - Almaty oblysy Úshtóbe qalasynyń turǵyny úıinde ózimen dastarhandas bolǵan adamnyń keýde tusyna pyshaq suǵyp óltirdi degen kúdikpen ustaldy, - dep habarlaıdy QazAqparat tilshisi.

«Sáýirdiń 26-synan 27-sine qaraǵan túni Qaratal aýdandyq aýrýhanasynyń dárigerleri polıtsııaǵa habar túsirgen. Olar jer úılerdiń birinen pyshaqpen azaptalyp óltirilgen 47 jastaǵy adamnyń múrdesi tabylǵanyn jetkizgen. Tártip saqshylary oqıǵa ornynan qanǵa malynǵan as úı pyshaǵyn tárkiledi. 52 jastaǵy úı ıesi kúdikti retinde ustaldy. Kúdiktiniń buǵan deıin de túrli qylmys jasap, bes ret sottalǵany anyqtaldy», - delingen Almaty oblystyq Polıtsııa departamenti baspasóz qyzmetiniń habarlamasynda.

Belgili bolǵanyndaı, mert bolǵan adam men kúdikti birge ishimdik ishken, artynsha ekeýiniń arasynda janjal týyndap, oqıǵa adam ólimimen aıaqtalǵan.

«QR Qylmystyq kodeksiniń 99-baby, ıaǵnı «Adam óltiý» faktisi boıynsha is qozǵalyp, tergeý júrip jatyr. Kúdikti qamaýda. Aıǵaq zattar tárkilendi. Qajetti saraptamalar taǵaıyndaldy», - dep tolyqtyrdy vedomstvonyń baspasóz qyzmetinen.

Buǵan deıin Taldyqorǵanda oqýshymen janjaldasqan muǵalimniń jumystan ketkenin jazǵan edik.