Býdýlaı rólin somdaǵan akter ómirden ozdy
ASTANA. QazAqparat - KSRO-nyń halyq ártisi kórermenderdiń ystyq yqylasyna bólengen «Syǵan» fılmindegi Býdýlaı rólinen keıin tanymal bolǵan Mıhaı Volontır Kıshınevte respýblıkalyq klınıkalyq aýrýhanada 82 jasyna qaraǵan shaǵynda dúnıeden ozdy, dep habarlady Lifenews.ru.
Ol birneshe jyldan beri qant sýsamyrynyń aýyr túrine shaldyǵyp, sońǵy úsh jylda jaǵdaıy asa aýyrlaǵan edi.
Eske salsaq, Anatolıı Kalınınniń bir ataýly romanynyń jelisimen rejısser Aleksandr Blank túsirgen «Syǵan», «Býdýlaıdyń qaıta oralýy» fılmderindegi Býdýlaı róli Volontırdi halyqtyń mahabbatyna bóledi. 1988 jyly ol KSRO halyq ártisi ataǵyn aldy. Sondaı-aq ol moldava kınosyndaǵy XX ǵasyrdyń úzdik akteri ataǵyn alǵan, «Eldiń kórnekti tulǵasy» syılyǵynyń ıegeri.
