BUDSJ engizýge baılanysty medıtsınalyq kómektiń qol jetimdiligi shekteledi degen paıymdaýlar negizsiz - Densaýlyq saqtaý mınıstri
ASTANA. 23 jeltoqsan. QazAqparat /Marlan Jıembaı/ - Birqatar opponentterdiń Biryńǵaı ulttyq densaýlyq saqtaý júıesin engizýge baılanysty medıtsınalyq kómektiń qol jetimdiligi shekteledi degen paıymdaýlary negizsiz.
Bul týraly búgin elordada ótken Biryńǵaı ulttyq densaýlyq saqtaý júıesin engizý qorytyndysyna jáne 2011 jylǵy mindetterge arnalǵan respýblıkalyq keńes barysynda QR Densaýlyq saqtaý mınıstri Salıdat Qaıyrbekova málim etti.
Onyń atap ótýinshe, statsıonarlardy erkin tańdaý múmkindigi arqasynda medıtsınalyq kómektiń qol jetimdiligi respýblıkalyq barlyq turǵyndary úshin arta túsken. Jyl basynan beri 550 myńnan astam adam tańdaý quqyǵyn paıdalanǵan.
Aǵymdaǵy jyly ótken jylmen salystyrǵanda statsıonarlyq jáne statsıonar almastyrǵysh kómektiń jıyntyq kólemi shamamen 226 myń oqıǵaǵa artqanyn atap ótken mınıstr: «Sondyqtan birqatar opponentterdiń Biryńǵaı ulttyq densaýlyq saqtaý júıesin engizýge baılanysty medıtsınalyq kómektiń qol jetimdiligi shekteledi degen paıymdaýlary negizsiz», - dedi.
Sondaı-aq aǵymdaǵy jyly ótken jylmen salystyrǵanda statsıonar almastyrǵysh kómekke tapsyrys berýshilerdiń sany birshama arta túsken. Kúndizgi statsıonarlardyń tarıfteriniń ekonomıkalyq turǵydan tartymdylyǵyn qamtamasyz etý de oń nájıesin berip otyr. Atap aıtqanda, ótken jylmen salystyrǵanda esepti kezeńde kúndizgi statsıonarda emdelip shyqqan azamattar sany 2 eseden astam ósken. Al júıe aıasynda ondaǵy tósek-oryn qoryn arttyra túsý shyǵyny mol statsıonarlyq kómektiń 9 paıyzǵa tómendeýine sebep boldy.
