Býdda kúni: Mońǵolııada dinı rásimder men merekelik sharalar ótip jatyr
ASTANA. KAZINFORM — Mońǵolııada aı kúntizbesi boıynsha jazdyń alǵashqy aıynyń 15-kúninde Býdda merekesi toılanady, dep habarlaıdy Montsame.
2025 jyly bul kún 11 maýsymǵa sáıkes kelip otyr.
Bul dinı mereke jyl saıyn ózgerip otyrady, sebebi ol aı kúntizbesi boıynsha jazdyń birinshi aıynyń on besinshi kúnine sáıkes keledi. Býdda kúni — Býddanyń ómirindegi úsh mańyzdy oqıǵaǵa arnalǵan: onyń dúnıege kelýi, nırvanaǵa (aǵartýshylyqqa) jetýi jáne parınırvanaǵa (ıaǵnı, bul dúnıeden ketýi) enýi.
Atalǵan kún býddıstik Azııa elderinde 2000 jyldan beri toılanyp keledi. 1999 jyly Birikken Ulttar Uıymy Bas Assambleıasy Býdda kúnin halyqaralyq deńgeıde atap ótý týraly sheshim qabyldady. Al Mońǵolııa Parlamenti 2019 jyly Memlekettik merekeler men saltanatty kúnder týraly zańǵa ózgerister engizip, Býdda kúnin resmı memlekettik mereke jáne demalys kúni dep bekitti.
Bul kúni el astanasynda basty býddıstik merekege arnalǵan saltanatty sherý ótedi. Sondaı-aq eldegi barlyq monastyrda, sonyń ishinde mońǵol býddızminiń ortalyǵy sanalatyn Gandantegchınlen monastyrynda monahtar arnaıy duǵalar, býddıstik rásimder men salt-joralardy oryndaıdy jáne dinı ýaǵyzdarymen bólisedi.
Osydan buryn Mońǵolııada qoı qyrqý boıynsha álemdik saıys jáne alǵash ret sút festıvali ótetinin jazǵan edik.