Býdapeshtte Qazaqstannyń úsh fılmi kórsetilip jatyr
ASTANA. KAZINFORM — Majarstan astanasy Býdapeshtte Qazaqstan kınosy kúnderi ótip jatyr, dep habarlaıdy QR Mádenıet jáne aqparat mınıstrliginiń baspasóz qyzmeti.
2026 jylǵy 12–14 qazan aralyǵynda Majarstan astanasy Býdapesht qalasynda Qazaqstan Respýblıkasynyń Majarstandaǵy Elshiligi Qazaqstan Respýblıkasynyń Mádenıet jáne aqparat mınıstrligi men Sháken Aımanov atyndaǵy «Qazaqfılm» kınostýdııasynyń qoldaýymen Qazaqstan kınosynyń kúnderin ótkizdi.
Tarıhı «Ýranııa» ulttyq kınoteatrynda ótken mádenı is-shara Qazaqstan kınematografııasyn halyqaralyq deńgeıde nasıhattaýǵa, Majarstan jurtshylyǵyn elimizdiń baı tarıhı-mádenı murasymen tanystyrýǵa, sondaı-aq eki memleket arasyndaǵy mádenı-gýmanıtarlyq yntymaqtastyqty odan ári damytýǵa baǵyttaldy.
Úsh kúndik baǵdarlama aıasynda kórermenderge Qazaqstan tarıhynyń ártúrli kezeńderin, ulttyq qundylyqtary men mádenı dástúrlerin, sondaı-aq qazirgi qoǵamnyń ózekti máselelerin beıneleıtin úsh kórkem fılm usynyldy.
Kıno kúnderiniń ashylýy 12 qazanda qazaqtyń kórnekti ánshisi Ámire Qashaýbaevtyń ómiri men shyǵarmashylyǵyna arnalǵan «Ámire» tarıhı-ómirbaıandyq fılminiń kórsetilimimen ótti. Ámire Qashaýbaev Eýropada halyqaralyq moıyndaýǵa ıe bolǵan qazaq mýzykalyq óneriniń alǵashqy ókilderiniń biri retinde tanymal.
13 qazanda jeke tańdaý, jaýapkershilik, adamı qarym-qatynas jáne adamgershilik qundylyqtar máselelerin qozǵaıtyn «Qaıtadan» («Restart») atty zamanaýı qazaqstandyq dramanyń kórsetilimi uıymdastyryldy.
14 qazanda Qazaqstan kınosynyń kúnderi «Anaǵa aparar jol» tarıhı dramasynyń kórsetilimimen qorytyndylandy. Fılmde qazaq halqy tarıhyndaǵy qaıǵyly oqıǵalar aıasynda analyq mahabbattyń qudireti, adam rýhynyń beriktigi jáne adam taǵdyrynyń kúrdeli qyrlary kórinis tapqan.
Іs-sharalar baǵdarlamasynyń basty oqıǵasy 13 qazanda ótken saltanatty rásim men resmı qabyldaý boldy. Oǵan dıplomatııalyq korpýs ókilderi, Majarstannyń memlekettik jáne qoǵamdyq qaıratkerleri, iskerlik jáne mádenı orta ókilderi, qazaqstandyq dıaspora músheleri men stýdentter qatysty.
Qonaqtarǵa Qazaqstan Respýblıkasynyń Majarstandaǵy Tótenshe jáne Ókiletti Elshisi Anel Baqytbekqyzy quttyqtaý sóz sóıledi.
Óz sózinde Elshi mádenıet pen kınematografııanyń halyqtar arasyndaǵy ózara túsinistik pen senimdi nyǵaıtýǵa, dostyq baılanystardy damytýǵa yqpal etetin qoǵamdyq dıplomatııanyń mańyzdy quraldary retindegi rólin atap ótti.
Sonymen qatar qazaqstandyq kınonyń ulttyq dástúrler men zamanaýı kórkemdik tásilderdi úılestire otyryp, sheteldik kórermenderge Qazaqstannyń tarıhyn, mádenıetin jáne rýhanı qundylyqtaryn tereńirek tanýǵa múmkindik beretini atap ótildi.
Elshi Qazaqstan men Majarstan arasyndaǵy dástúrli dostyq qatynastardyń ózara qurmetke, tarıhı-mádenı jaqyndyqqa jáne kópsalaly yntymaqtastyqty odan ári keńeıtýge degen ortaq umtylysqa negizdelgenin atap ótti.
Osy turǵyda mádenı-gýmanıtarlyq baılanystardy damytý, shyǵarmashylyq qaýymdastyqtar arasyndaǵy yntymaqtastyqty nyǵaıtý jáne birlesken mádenı bastamalardy iske asyrý Qazaqstan men Majarstan arasyndaǵy áriptestikti odan ári tereńdetýdiń mańyzdy baǵyttary bolyp tabylady.
Іs-sharanyń mańyzdylyǵyn arttyrǵan jaıttardyń biri — qazaqstandyq kınoındýstrııa ókilderiniń Býdapeshtke arnaıy kelip, majar kórermenderimen jáne mádenıet salasynyń ókilderimen tikeleı júzdesýi boldy.
Qurmetti qonaqtar qatarynda «Ámire» fılminde basty róldi somdaǵan tanymal qazaqstandyq akter Sanjar Mádı, «Qaıtadan» fılminiń prodıýseri Jalyn Tleýbergenov, sondaı-aq Sháken Aımanov atyndaǵy «Qazaqfılm» kınostýdııasynyń dıstrıbýtsııa jáne marketıng bóliminiń jetekshisi Gúlzat Shýrenova-Qalıshýk boldy.
Qazaqstandyq kınoındýstrııa ókilderiniń qatysýy kórermenderge zamanaýı ulttyq kınematografııanyń damý úrdisterimen, fılm óndirisiniń erekshelikterimen jáne qazaqstandyq týyndylardy halyqaralyq deńgeıde ilgeriletý perspektıvalarymen tanysýǵa múmkindik berdi.
Qazaqstan kınosynyń kúnderine 200-den astam qonaq qatysty. Olardyń qatarynda Majarstannyń memlekettik jáne qoǵamdyq qurylymdarynyń, dıplomatııalyq korpýstyń, iskerlik jáne mádenı ortanyń ókilderi, qazaqstandyq dıaspora músheleri men stýdent jastar boldy.
Kórsetilgen fılmder kórermenderdiń qyzyǵýshylyǵyn týdyryp, qazaqstandyq kınematografııanyń jan-jaqtylyǵyn, ulttyq tarıhtyń mańyzdy kezeńderin beıneleýmen qatar, halyqaralyq aýdıtorııaǵa ortaq jalpyadamzattyq qundylyqtardy dáripteý múmkindigin kórsetti.
Býdapeshtte Qazaqstan kınosy kúnderiniń ótkizilýi eki el arasyndaǵy mádenı baılanystardy damytýdaǵy mańyzdy oqıǵaǵa aınaldy. Atalǵan is-shara gýmanıtarlyq baılanystardy keńeıtýge, eki halyqtyń mádenı murasyna degen ózara qyzyǵýshylyqty arttyrýǵa jáne Majarstanda Qazaqstannyń tanymaldylyǵyn nyǵaıtýǵa yqpal etti.
Osyǵan deıin Frantsııada Qazaqstan kınosy kúnderi bastalǵanyn jazǵanbyz.
