Býdapeshtte anshlag: Dımashtyń kontsertin tamashalaýǵa álemniń 77 elinen kórermen keldi

ASTANA. KAZINFORM - Býdapeshtte  Stranger týry aıasynda Dımashtyń alǵashqy jeke kontserti ótti.

Majarstandaǵy eń úlken alań – Laslo Papp sporttyq arenasynda anshlag. 77 elden kelgen ánshiniń jankúıerleri Dears fandomynyń birdeı fýtbolkalary, jıletteri, sharftary men basqa da túrli tústi atrıbýttarymen óte ádemi kórindi, – dep jazdy dimashnews.com.

Ár elde ótkiziletin Dımash shoýy halyqaralyq merekege aınalyp jatyr. Álemniń túkpir-túkpirindegi ánshi jankúıerleri qalaǵa aldyn ala kelip, bir-birimen tanysyp, dástúrli pre-party stılinde kezdesý uıymdastyrady.

Býdapeshttegi kontsertte eýropalyq avtorlardyń «GOLDEN» jáne «S. O. S D ' un TERRIEN EN DÉTRESSE» shyǵarmalary Qytaı jáne japon kompozıtorlarynyń «battle of MEMORIES», «JUST LET it BE» jáne «AUTUMN STRONG» sekildi týyndylarymen úılese oryndaldy.

Dımashtyń gastroldik týrynyń basty mindetteriniń biri – kórermenderdi Qazaqstannyń dástúrli jáne zamanaýı mádenıetimen tanystyrý. «Dúrdaraz» halyq áni, «Adaı» kúıimen qatar sahnada belgili otandyq avtorlar Ediljan Ǵabbasovtyń «FLY AWAY», Djordan Arakelıan, Aıgúl Bajanova men Muńaıdar Balmoldanyń «Mahabbat ber maǵan» jáne Dımashtyń inisi Ábilmansurdyń «TOGETHER» atty alǵashqy kompozıtorlyq shyǵarmalary shyrqaldy. Dımashtyń «Stranger» týry Vengrııada ánshiniń jeke kontsertimen jalǵasyn tapty.

Dımash Qudaıbergenniń kelesi kontserti 24 mamyrda Ystanbul qalasynda 30 jasqa tolǵan týǵan kúnine oraı ótkiziledi.