Býdapeshtte Abaıdyń shyǵarmalary ulyqtaldy

BÝDAPEShT. KAZINFORM — Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń «Abaı ınstıtýty» qazaqtyń uly oıshyly, aqyn Abaı Qunanbaıulynyń 180 jyldyǵyna arnalǵan halyqaralyq ashyq sabaq uıymdastyrdy. Bul týraly SІM-niń baspasóz qyzmeti málim etti.

Іs-sharada sóılegen sózinde Qazaqstannyń Majarstandaǵy Elshisi Abzal Saparbekuly Abaı shyǵarmalarynyń eki eldiń mádenı baılanysyndaǵy erekshe ornyna toqtalyp, ádebıet salasy boıynsha Nobel syılyǵyn ıelengen Laslo Krasnahorkaıdyń jeńisimen túrki jurtshylyǵyn quttyqtady.

Qazaqstan Respýblıkasy Ǵylym jáne joǵary bilim mınıstrligi Til saıasaty komıtetiniń Tóraǵasy Erbol Tileshov Abaı shyǵarmashylyǵy týraly baıandama jasap, tyńdaýshylardyń qazaq tili men mádenıetine degen súıispenshiligine óz qurmetin bildirdi.

— Abaı murasy adamzatqa ortaq ekenin Abaı ınstıtýtynyń qazaq tili kýrsyn oqyp júrgen Parıj, Ankara, Ulanbatyr, Býdapeshttegi til úırenýshilerimiz taǵy bir aıshyqtaı tústi. Olar «Ásempaz bolma árnege», «Ǵashyqtyń tili — tilsiz til», «Kózimniń qarasy», «Jelsiz túnde jaryq aı» óleńderin jatqa oqyp, qazaqtyń ánin shyrqap, ulttyq aspaptarymyzben óner kórsetti, — delingen habarlamada.

Eske sala keteıik, buǵan deıin Abaıdyń «Qara sózderi» ortaq túrki álipbıinde jaryq kórgen edi.