Býdapesht vokzalynyń mańynda mıgranttar polıtsııamen tóbelesti

ASTANA. QazAqparat - Býdapesht vokzalynda mıgranttar men polıtsııa qyzmetkerleri arasynda qaqtyǵys oryn aldy. Vengrııa bıligi pana tabý úshin Germanııa jáne basqa da batyseýropalyq elderge attanbaq bolǵan olarǵa poıyzǵa otyrýǵa tyıym salǵan.

Polıtsııa birneshe jas mıgrantty qamaýǵa alyp, olardy eldiń shyǵysynda bosqyndardy qabyldaý ortalyqtaryna deıin jetkizetin poıyzdarǵa kúshtep salǵan kórinedi, dep habarlaıdy Bı-bı-sı.

Mıgranttar Keletı vokzalynyń mańynda narazylyq sharasyna shyqty. Olar qoldanýǵa múmkindik berilmeı otyrǵan jol júrý qujattaryna júzdegen eýro jumsaǵandaryn aıtyp, shaǵymdanǵan.

Vengrııa bıligi óz áreketin memlekettik shekaralardy qorǵaý mindettemelerin oryndaýǵa talpynysymen túsindirýde.

Eýroodaqtyń barlyq elderi qol qoıǵan Dýblın kelisimine sáıkes, bosqyndar EO-ǵa kelgen birinshi elden pana tabý ótinishin bildirýge mindetti bolyp tabylady.