Býdapesht pen Nur-Sultan arasynda turaqty áýe reısi ashylady

NUR-SULTAN. QazAqparat – Qazaqstan men Vengrııa arasynda turaqty áýe reısi ashylady. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat tilshisi.

Vedomstvo málimetinshe, 31 tamyzda Qazaqstan Respýblıkasynyń aýmaǵynda koronavırýstyq ınfektsııanyń paıda bolýy men taralýyna jol bermeý jónindegi vedomstvoaralyq komıssııanyń kezekti otyrysy ótip, onda Qazaqstan men Vengrııa arasyndaǵy turaqty áýe qatynasyn qalpyna keltirý máselesi qaraldy.

«QR IIDM Azamattyq avıatsııa komıteti men Vengrııadaǵy QR Elshiliginiń birlesken jumysynyń arqasynda 2021 jylǵy 9 qyrkúıekten bastap Vengrııanyń «Wizz Air« áýe kompanııasy Býdapesht pen Nur-Sultan qalalary arasynda A320 ushaqtarymen aptasyna 1 ret turaqty reısterdi qaıta bastaýdy josparlap otyr. Vengrııaǵa jasalatyn reıster sanyn ulǵaıtý máselesi epıdemıologııalyq jaǵdaıǵa jáne vedomstvoaralyq komıssııanyń tıisti sheshimderine baılanysty qabyldanady», - dep atap ótedi mınıstrlikten.

Aıta keterligi, reıster sanıtarlyq-epıdemıologııalyq talaptardy qatań saqtaı otyryp jáne áýe kompanııasynyń saıtynda jarııalanǵan kestege sáıkes oryndalady.