Býdapesht qalasynda Abaıdyń 175 jyldyǵy atap ótildi
Býdapeshtte Qazaqstan Respýblıkasynyń Elshiligi QR Ulttyq akademııalyq kitaphanasy delegatsııasynyń qatysýymen qazaq aqyny Abaıdyń 175 jyldyq mereıtoıyn merekeleý aıasynda dóńgelek ústel ótkizdi. Shara barysynda «Álem tanyǵan Abaı» kitap-ıllıýstratıvti kórmesi men «Abaı álemi» fotokórmesi uıymdastyryldy.
Majarstan men Qazaqstannyń shyǵarmashylyq zııaly qaýymynyń, qoǵamdyq-saıası, ǵylymı jáne mádenı ortasynyń ókilderi, Qazaqstan Jazýshylar odaǵynyń tóraǵasy bastaǵan abaıtanýshylar, qazaq dıasporasy, sondaı-aq qazaq tilin, mádenıeti men salt-dástúrin úırenip júrgen majarlyq stýdentter qatysqan is-shara Túrkitildes memleketter yntymaqtastyǵy keńesi Ókildiginiń ǵımaratynda ótti.
Qazaqstannyń Majarstandaǵy Elshisi Jánibek Ábdrashov Qazaqstan men Majarstan arasynda saıası-ekonomıkalyq qarym-qatynastar ǵana damyp qoımaı, sonymen qatar mádenı-gýmanıtarlyq yntymaqtastyq ta qarqyndy ilgerilep kele jatqanyn, atap aıtqanda Býdapeshtte Abaıdyń eskertkishi bar ekenin atap ótti.
Majar tarapynan Majarstan Premer-mınıstriniń keńesshisi, majarlyq pen-klýb prezıdenti G.Sech sóz alyp, álemdik mádenı muraǵa úlesin qosqan Abaıdyń eńbeginiń tereń pálsapalyq oılaryna toqtaldy. Sonymen qatar Qazaqstan men Majarstan arasynda ekijaqty mádenı-gýmanıtarlyq qarym-qatynastardyń damýyna joǵary baǵa berdi.
Іs-shara barysynda majar tilinde M.Áýezovtiń «Abaı joly» kitabynyń tusaýkeseri boldy.
Іs-sharadan keıin Býdapesht qalasynda ortalyq parktegi Astana kóshesinde Abaı Qunanbaıulynyń eskertkishine gúl shoǵyn qoıý rásimi boldy. Qazaq dıasporasy, sondaı-aq qazaqstandyq jáne majarlyq stýdentter Abaıdyń óleńderi qara sózderin oqyp, ánderin oryndady.
