«Býdapesht», «Family Village» turǵyn úı keshenderiniń problemasyn kóterýge daıynmyn - májilismen
«Qazaqstanda energııa tıimdilikti arttyrý» jobasynyń qorytyndysyna arnalǵan saltanatty sharadan keıin BAQ ókilderi osy máselemen aınalysyp júrgen Májilis depýtaty Eldos Abaqanovtan astanadaǵy ınfraqurylymdyq problemasy bar turǵyn úılerdiń keleshegi týraly suraq qoıdy.
«Biz ótkende osy másele boıynsha kezdesý ótkizdik. Árıne, máseleniń sebebin zertteý kerek. Ákimdik nelikten avtonomdy jylý nysanyn ornatýǵa ruqsat berdi? Ol úıler salynyp bastaǵan kezde tıisti ınfraqurylym bolǵan joq. Biraq qurylys salǵan kompanııalar sheshim retinde azamattarǵa usynyp, osyndaı ǵımarattardy saldy. Qysty kúni jylýǵa tóleıtin qarajat kólemi óte joǵary. Ony «Family Village» turǵyn úı kesheniniń turǵyndary bizge aıtty. Qysta jylýǵa ǵana 60-70 myń teńge, tipti 90 myń teńgege deıin tólep shyqqan. «Býdapeshti» de aıtyp otyrsyz. Birinshiden, ákimdik nelikten ınfraqurylymy joq jerge úı salýǵa ruqsat berdi? Sol suraqqa jaýap tabý kerek. Ekinshiden, ákimdiktiń josparynda osyndaı ortalyqtandyrylmaǵan nysandarǵa jylý jetkizý maqsaty bar ma, joq pa? Sony qaraý kerek», - dedi Eldos Abaqanov.
Onyń paıymynsha, tehnologııa durys saqtalsan avtonomdy qazandyqty da tıimdi paıdalanýǵa bolady.
«Negizi kez kelgen qurylystyń tehnıkalyq shartyn jasaǵan kezde ony salýshy uıym ortalyqtandyrylǵan jylýǵa qosylmaımyz, avtonomdy qazandyq salamyz dep aıtýy múmkin. Sóıtken kúnniń ózinde, energııa tıimdilik jaǵynan qarasaq, basynda bekitilgen talaptar boıynsha salynsa, búkil tehnologııa saqtalsa, múmkin turǵyndar jylýdyń aqysyn az tóleıtin de edi», - degen depýtat bul máseleni mınıstrlik deńgeıinde kóterýge daıyn ekenin aıtty.
«Naqty bul máseleni kóterýge daıynbyz. Óıtkeni ol tek biz atap ótken 2 nysannyń basyndaǵy problema emes. Birshama nysan bar shyǵar, Jaǵalaý aımaǵy bolsyn, basqa aımaqtar bolsyn. Kóterip, nelikten solaı bolǵanyn, mánin bileıik. Bıýdjette ol problemany sheshýge qarajat bar ma, sonyń bárin naqtylaý kerek. Bul másele boıynsha depýtattyq saýal joldaýǵa daıynmyn», - dedi Májilis ókili.
Buǵan deıin Kókshetaý oblysy Qosshy qalalyq polıtsııa bólimi Qosshydaǵy «Diamond park» turǵyn úı kesheni merdigerleri tergelip jatqanyn habarlaǵan edi.
