«Budan joǵary nátıje kútken edik»: federatsııa tóraǵasy jankúıerlerden keshirim surady
ASTANA. KAZINFORM — 1 qarashada Astana qalasyndaǵy «Barys Arena» sport kesheninde kúresten Álem chempıonatynyń saltanatty jabylý rásimi ótti. Toǵyz kúnge sozylǵan dúbirli dodaǵa álemniń 135 elinen 900-den astam sportshy qatysyp, 30 salmaq dárejesinde júldeler sarapqa salyndy.
Saltanatty rásimde sóz alǵan Birikken kúres áleminiń (UWW) prezıdenti Nenad Lalovıch Astanada ótken chempıonattyń uıymdastyrylýyna joǵary baǵa berdi. Ol Qazaqstannyń nebári 4-5 aıdyń ishinde osyndaı aýqymdy halyqaralyq jarysty ótkizýge daıyndalyp, barlyq uıymdastyrýshylyq mindetti joǵary deńgeıde atqara alǵanyn erekshe atap ótti.
— Bul erekshe álem chempıonaty boldy. Jarystyń qanshalyqty joǵary deńgeıde uıymdastyrylǵanyna barlyǵymyz kýá boldyq. Osy aýqymdy dodanyń ótýine atsalysqan árbir azamatqa shynaıy alǵysymdy bildiremin. Búgin chempıonat óz máresine jetkenimen, álemdik kúrestiń tarıhynda taǵy bir jarqyn beles bolyp qalmaq. Astanada ótken bul birinshilik barshamyzdyń esimizde erekshe áserimen, jyly estelikterimen saqtalatynyna senimdimin, — dedi Nenad Lalovıch.
Osydan keıin UWW prezıdenti Álem chempıonatyn joǵary deńgeıde uıymdastyrǵany úshin Qazaqstan kúres federatsııasynyń tóraǵasy Erkin Oqasovqa halyqaralyq uıymnyń atynan arnaıy estelik syılyq pen chempıondarǵa arnap tigilgen RUDIS kompanııasynyń jeıdesin tabystady.
Aıta keteıik, mundaı marapat Qazaqstannyń kúres tarıhynda alǵash ret berilip otyr.
Óz kezeginde Qazaqstan kúres federatsııasynyń tóraǵasy Erkin Oqasov chempıonatty uıymdastyrýǵa atsalysqan azamattarǵa alǵysyn bildirip, ulttyq quramanyń jarystaǵy nátıjesine qatysty óz ustanymyn ashyq jetkizdi. Ol qazaqstandyq balýandardan budan da joǵary kórsetkish kútkenin aıtyp, aldaǵy ýaqytta sporttyq nátıjeni jaqsartý federatsııa jumysynyń basty mindeti bolatynyn atap ótti.
— Otandyq balýandardyń Álem chempıonatynda kórsetken nátıjesine kóńilim tolmaıdy. Biz budan joǵary kórsetkish kútken edik. Al chempıonatty uıymdastyrý turǵysynan Astana ózine júktelgen mindetti abyroımen atqardy. Sporttyq nátıjeler úshin federatsııanyń atynan barsha jankúıerden keshirim suraımyn. Biz jumysymyzdy endi bastap jatyrmyz. Aldaǵy ýaqytta sportshylarymyzdyń nátıjesin jaqsartý úshin bar kúsh-jigerimdi jumsaýǵa daıynmyn. Bul meniń ǵana emes, bapkerler men balýandardyń da ortaq maqsaty. Bizdi qoldap, toǵyz kún boıy jankúıer bolǵan barshańyzǵa myń alǵysymdy bildiremin! — dedi Erkin Qadyrǵalıuly.
Saltanatty jabylý rásiminde Álem chempıonatynyń aýyspaly týy 2027 jylǵy birinshilikti qabyldaıtyn AQSh delegatsııasynyń ókilderine tabystaldy. Osylaısha, toǵyz kún boıy álemdik kúres qaýymdastyǵynyń nazarynda bolǵan Astanadaǵy chempıonat resmı túrde aıaqtaldy.
Qazaqstan kúres federatsııasy aldaǵy ýaqytta ulttyq quramalardyń daıyndyǵyn kúsheıtýge, bapkerler men sportshylardyń jumysyn jetildirýge jáne halyqaralyq jarystardaǵy nátıjeni jaqsartýǵa basymdyq beredi.
Osyǵan deıin Qazaqstan balýandary kúresten álem chempıonatyn bes medalmen qorytyndylaǵanyn jazdyq.
