Budan bylaı jumysqa ornalasatyn kezde qujat jınaý qajet emes
Eńbek sharttaryn esepke alýdyń biryńǵaı júıesi (E-hr) kásiporyndardyń kadrlyq bólimderinde qyzmetkerlerdi resimdeý ýaqytyn qysqartýǵa kómektesedi. «Eńbek resýrstaryn damytý ortalyǵy» AQ jumysqa ornalasý kezinde qajetti qaǵaz qujattardy qajet etpeıtin E-hr júıesin engizdi. Endi kadr qyzmeti barlyq qajetti qujattardy ( jeke kýálik derekteri, bilimi, turatyn jeri, densaýlyq, sottylyǵynyń bar-joǵy ) derbes jáne elektrondy túrde ala alady.
«E-hr júıesi azamattardyń eńbek ótili boıynsha derekterdiń saqtalýyn jáne naqty derek qoryn qalyptastyrady. Jumys berýshimen qyzmetker arasyndaǵy kelisim-sharttyń ashyq bolýyn, qujattardy qoldan jasaý qaýpin joıady. Bastysy jumysqa ornalasýdy jedeldetedi. Sondaı-aq, eńbek shartyn jasaý kezinde eńbek kitapshalarynan jáne qaǵaz qujattardan bas tartýǵa múmkindik beredi», - dedi «ERDO» AQ Derekterdi taldaý jáne óńdeý departamentiniń dırektory Bahtııar Jazyqbaev.
Kásiporyndarǵa jańa servısti paıdalaný úshin bar bolǵany E-hr júıesine tirkelý qajet. Jańa jumysshynyń «jeke isine» qujattar jınaý úshin onyń kelisimin alyp, júıege suraý salý kerek. Ári qaraı baǵdarlama barlyǵyn ózi avtomatty túrde jasaıdy.
Qazirgi ýaqytta E-hr QR Bilim jáne ǵylym mınıstrliginiń aqparattyq júıelerimen, sondaı-aq QR Ádilet mınıstrliginiń jeke tulǵalardyń memlekettik bazasymen ıntegratsııa jasalǵan. 2020 jyldyń sońyna deıin QR Densaýlyq saqtaý mınıstrliginiń jáne QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń aqparattyq júıesimen biriktirý josparlanýda.
Esterińizge salsaq, E-hr júıesi 2018 jyldan bastap pılottyq rejımde jumys isteıdi. Qazirgi ýaqytta júıege erikti negizde 28 myńnan astam qazaqstandyq kompanııa qosyldy. Búginde E-hr-da 1,3 mln elektrondyq eńbek sharty tirkelgen. 2020 jyldyń birinshi jartysynda júıege taǵy 25 myńǵa jýyq jumys berýshini qosý josparlanyp otyr.
