Budan bylaı úıde janýar asyrap, ony kútip-baǵý zańmen retteledi – Danııar Turǵambaev

NUR-SULTAN. QazAqparat – Kúni keshe ǵana Memleket basshysy janýarlarǵa jaýapkershilikpen qaraý týraly zańǵa qol qoıdy. Osy oraıda QazAqparat tilshisi sala mınıstrliginiń ustanymy týraly QR Ekologııa, geologııa jáne tabıǵı resýrstar mınıstrligi orman sharýashylyǵy jáne janýarlar dúnıesi komıteti tóraǵasynyń orynbasary Danııar Turǵambaevtan surap bildi.

«Jańa zańnyń basty maqsaty – adamdardyń janýarlarǵa degen qarym-qatynasyn retteý. ıAǵnı, endigi ýaqytta janýar asyrap, ony kútip-baǵý zańmen retteledi. 2023 jyldyń qyrkúıek aıynan bastap, elimizde úı janýarlaryn mindetti esepke alý engiziledi. Úı janýarlaryn esepke alý - zańdaǵy basty ózgeris pen jańashyldyqtyń biri. Olardy esepke alý, máseleni retteý men sheshýge múmkindik beredi. Mysaly, qańǵybas ıtter ózinen-ózi kóbeıip jatqan joq qoı, demek keıbireýler ıt-kúshikterdi dalaǵa tastaı salady degen sóz. Sonyń saldarynan qańǵybas ıttiń sany artyp jatyr. Búginde úı janýarlaryn mindetti esepke alýdyń normatıvtik-quqyqtyq aktisin ázirlep jatyrmyz. Sonymen qatar qańǵybas ıtterge vaktsına salý jáne olardy sterıldeý de qarastyrylǵan», - dedi Danııar Turǵambaev.

Onyń aıtýynsha, zańdaǵy taǵy bir jańashyldyq - qańǵybas úı janýarlary sanyn azaıtý maqsatynda olardy óltirýge tyıym salynady.

«Búginde qańǵybas ıtterdi aýlaıdy jáne óltiredi. Endi olaı bolmaıdy, qańǵybas ıtti aýlaıdy, ony tekseredi, eger ıt saý bolsa, oǵan vaktsına salyp, sterıldep qaıta bosatyp jiberedi. Odan bólek, aldaǵy ýaqytta elimizde jyljymaly haıýanattar baǵy, okeanarıým men delfınarıı qyzmetine tyıym salynbaq. Bul aldymen zooqorǵaýshylardyń usynysy, ekinshiden, jyljymaly haıýanattar baǵynda janýarlarǵa tıisti jaǵdaıdyń jasalmaǵandyǵyna kózimiz jetip otyr. Haıýanattar baǵyna tyıym 2023 jyldan bastap, al delfınarıı qyzmetine 2029 jyldan bastap tyıym salynady», - deıdi ol.

Sondaı-aq, spıker janýarlarǵa qatygezdik tanytqan jandarǵa qandaı jaza qoldanylatyny týraly aıtyp berdi.

«Buǵan deıin janýardy qorlaǵan adamnyń kinásin dáleldeý men ony jazalaý ońaıǵa túspedi. Qylmystyq kodekstiń 316 baby 3 tarmaqtan turady. Ol boıynsha eger janýardy mert qylsa 120 AEK kóleminde aıyppul salynady, al janýardyń ólimine ákelip soqsa, kináli qatygezdigi úshin 200 AEK kóleminde aıyppul tóleıdi. Atalǵan baptyń 3-shi tarmaǵyna sáıkes janýarǵa qatygezdik kórsetý jaǵdaıy qaıtalansa, oǵan bir top adamnyń qatysy bolsa nemese bir emes, birneshe janýardy qorlasa, ol jaǵdaıda 1000 AEK aıyppul qarastyrylǵan. Osydan bólek, ákimshilik jaýapkershilikke tartý jaǵy da bar. Ol boıynsha 5 AEK aıyppul tóleý mindetteledi, eger qaıtalansa - aıyppuldyń kólemi 20 AEK deıin ósedi», - dedi komıtet basshysynyń orynbasary.

Aıta ketsek, keshe Memleket basshysy «Janýarlarǵa jaýapkershilikpen qaraý týraly» Qazaqstan Respýblıkasynyń Zańyna qol qoıdy.