Budan bylaı álem rekordyn jańartqan qazaqstandyq sportshylar tıisti nagradalar alatyn bolady - QR Týrızm jáne sport mınıstri
ASTANA. Tamyzdyń 9-y. QazAqparat /Gúlmıra Álıakparova/ - Búgin QR Týrızm jáne sport mınıstri Temirhan Dosmuhamedov aýyr atletıka boıynsha respýblıka bapkerlerimen bolǵan kezdesýinde álem rekordyn jańartqan qazaqstandyq sportshylarǵa tıisti nagradalar berilý úshin qoldanystaǵy erejege ózgertýlerdi engizýdi tapsyrdy.
Eske sala keteıik, aǵymdaǵy jylǵy shildeniń 30-y men tamyzdyń 5-i aralyǵynda Taldyqorǵan qalasynda aýyr atletıkadan ótken áıelder men erler arasyndaǵy Qazaqstan chempıonatynda, 2009 jylǵy álem chempıony Vladımır Sedov julqa kóterýden jańa álemdik rekord (191 keli) ornatqan bolatyn.
Chempıonat respýblıkalyq deńgeıde ótkendikten, V.Sedovtyń ornatqan bul rekordy esepke alynbaıdy. Bul úshin V.Sedovqa saıys kúnderi jeke esebine qosymsha 20 upaı ǵana qosylady. Onyń ústine, qoldanystaǵy erejelerde álemdik rekordty jańartqan sportshyǵa qandaı da bir nagradalardy berý qarastyrylmaǵan.
Osyǵan baılanysty búgin ótken keńes barysynda T.Dosmuhamedov bul máseleni sheshýdi qolǵa alýdy tapsyrdy.
«Álemdik rekord ornatqany úshin biz eshqandaı nagrada bermeıtinimiz ókinishti. Bul basshylardyń, múmkin meniń de tarapymnan jiberilgen qatelik shyǵar. Erejege tıisti ózgertýlerdi engizýdi tapsyramyn. Óz kezegimde bul máseleni jyl sońyna deıin sheshýge tyrysamyn», - dep atap ótti mınıstr.
