Budan bir ǵasyr buryn jaryq kórgen «Qazaq» gazeti Alash jurtynyń yqylaspen oqıtyn basylymyna aınaldy
ASTANA. QazAqparat - Búgin Alashtyń Alash bolyp qalyptasýyna úlken úlesin qosqan qazaqtyń ata gazeti «Qazaq» gazetiniń jaryqqa shyqqan kúni. Qazaq gazeti - 1913-1918 jyldary Orynbor qalasynda jarııalanyp turǵan qoǵamdyq-saıası jáne ádebı-mádenı basylym. Onyń tuńǵysh nómiri 1913 jyly 2 aqpanda shyqqan.
Basylym 1915 jylǵa deıin aptasyna bir ret, odan keıin eki ret shyqqan. Bastyrýshysy - «Azamat» seriktigi. Gazetke qarjylaı kómekteskenderdiń kóshbasynda Mustafa Orazaıuly bar. Jalpy 265 nómiri jaryq kórgen. Gazet rámizdik-beıne retinde kıiz úıdi usyndy. Bul - qazaq ulty degen uǵymdy berdi. Onyń túndigi batystan ashylyp, esigine «Qazaq» dep jazyldy. Muny túsindirgen ult zııalylary «qazaq ishine Eýropa ǵylym-óneri taralsyn, «Qazaq» gazeti qazaq jurtyna ári mádenıet esigi, ári syrt jurt jaǵynan kúzetshisi bolsyn» dep jazdy.
«Qazaq» gazetin shyǵarýdy uıymdastyrýshy, redaktory - A.Baıtursynuly, onyń ókiletti ókili M.Dýlatuly boldy. 1918 jyly gazetti Januzaq Jánibekuly basqardy. Basylymda A.Baıtursynuly, Á.Bókeıhan, M.Dýlatuly, M.Shoqaı, M. Tynyshbaıuly, Sh.Qudaıberdiuly, Ǵ.Qarash, R.Mársekov, J.Tileýlın, Ǵ.Musaǵalıev, M.Jumabaev, H.Bolǵanbaev, H.Ǵabbasov, J.Aqpaev, J.Seıdalın, S.Toraıǵyrov, A.Mámetov, S.Dónentaıuly, H.Dosmuhameduly t.b. avtorlardyń maqalalary jarııalanyp turdy.
XX ǵasyr basynda atalǵan gazet oqyǵandardyń, dindarlardyń, shákirtterdiń, qarapaıym saýaty bar adamdardyń, tutastaı jalpy ulttyń yqylaspen oqıtyn basylymyna aınaldy. Budan keıin paıda bolǵan barsha elshil gazet-jýrnaldar osy «Qazaqtyń» shekpeninen shyqty.
