Budan bylaı jeke mektepter tek naqty qajettilik týyndaǵan óńirlerde ǵana ashylady

ASTANA. KAZINFORM — Elimizde jeke mektepterge qoıylatyn talaptar ózgeredi. Bul týraly Almaty qalasyndaǵy jeke mektepterdiń quryltaıshylary men dırektorlarynyń qatysýymen ótken kezdesýde Oqý-aǵartý mınıstri Juldyz Súleımenova málimdedi.

Mınıstrlik atap ótkendeı, budan bylaı elimizde jeke mektepter tek naqty qajettilik týyndap otyrǵan óńirlerde ǵana ashylady. Lıtsenzııa tek úshaýysymdy mektepterdi, apatty jaǵdaıda turǵan bilim ordalaryn almastyrý maqsatynda memlekettik mektepter jetispeıtin óńirlerge ǵana beriledi.

— Sonymen qatar, jeke mektepter quryltaıshylarynyń jaýapkershiligi de zań aıasynda jetildiriledi. Olar mektepterdegi bilim sapasy, ustazdardyń biliktiligi jáne oqýshylardyń qaýipsizdigin qamtamasyz etýge jaýapkershilik alady. Qazir quryltaıshylardyń ǵana emes, mektep dırektorlaryn taǵaıyndaý tártibin de ózgertý josparlanyp otyr. Endi mektep dırektorlaryn burynǵydaı quryltaıshylar tańdamaıdy. Sheshim qabyldaý kezinde salalyq mınıstrlik pen jergilikti atqarýshy organdardyń kelisimi eskeriledi, — delingen habarlamada.

Qazir elimizdegi 785 jeke mekteptiń qujattary tsıfrlandyryldy, jalpy lıtsenzııasy bar 890 jeke mektep bar. Úkimet jańadan ashylatyn jeke mektepterge memlekettik tapsyrys ornalastyrý isine moratorıı jarııalaýdy josparlap otyr.

Budan buryn Astanada lıtsenzııasyz jumys istegen jeke mektepke aıyppul salynǵany anyqtaldy.