Budan bylaı zeınetaqy jınaǵyna plastıkalyq operatsııa jasaýǵa tyıym salyndy
ASTANA. KAZINFORM — Plastıkalyq otalarǵa arnalǵan ótinimder sany 130 esege artqan. Osyǵan oraı enpf-otbasy.kz platformasynda BZQ qarajatyn bul maqsatta paıdalaný boıynsha ótinim qabyldaý toqtatylady. Bul týraly «Otbasy banktiń» baspasóz qyzmeti habarlady.
enpf-otbasy.kz platformasynda stomatologııa men oftalmologııaǵa BZQ qarajatyn paıdalaný úshin ótinim qabyldaý toqtatylǵannan keıin, qazaqstandyqtar jańa maqsatty jappaı tańdaı bastady. Ol rekonstrýktıvti jáne qalpyna keltirý (plastıkalyq) operatsııalary. Bul baǵytqa ásirese operatsııadan keıingi tyrtyqtardy túzetý jáne týa bitken aqaýlardy korrektsııalaý úshin suranys artty.
Otbasy bank mundaı ótinimderdiń sany boıynsha kúrt ósimdi baıqady. Buryn bankke plastıkalyq otalarǵa BZQ qarajatyn paıdalaný týraly azamattardan orta eseppen 16 ótinish túsetin. Alaıda qyrkúıekte stomatologııa boıynsha ótinim qabyldaý toqtaǵan kezde olardyń sany 123-ke deıin ósti, qazanda — 1 844-ke, al qarashada — 3 878 ótinishke jetti.
Jeltoqsannyń alǵashqy 8 kúninde, oftalmologııaǵa ótinim qabyldaý toqtaǵannan keıin, plastıkalyq otalarǵa BZQ paıdalaný boıynsha 2 093 ótinish tústi. Bul — burynǵy aılyq ortasha kórsetkishten 130 ese kóp.
Jeltoqsan aıyndaǵy ótinimderdiń jalpy somasy 1,8 mlrd teńgege jetti.
— Azamattardyń zeınetaqy qarajatynyń maqsatty paıdalanylýyn qadaǵalaý — Otbasy bankiniń mindeti. Plastıkalyq otalarǵa degen qyzyǵýshylyqtyń kúrt artqanyn baıqaǵan kezde, biz bul jaǵdaıdan BZQ qarajatyn maqsatsyz paıdalaný qaýpin kórdik. Sondyqtan osy baǵyt boıynsha ótinim qabyldaýdy toqtatýǵa májbúr boldyq. Otbasy bank árqashan ashyq jumys isteıdi jáne klıentterdiń múddesin birinshi orynǵa qoıady — bul bizdiń qaǵıdatty ustanymymyz ári áleýmettik jaýapkershiligimizdiń kórinisi. BJZQ-daǵy qarajat — azamattardyń bolashaq zeınetaqysy. Iá, qazaqstandyqtar zeınetaqy artylǵan qarajatyn belgili bir maqsattarǵa paıdalana alady. Qazir osy múmkindikti jeleý etip, keıbireýler BZQ qarajatyn deldaldar arqyly zańsyz jolmen sheship alyp jatyr. Al shyn máninde, paıda taýyp otyrǵan — sol deldaldar. Otbasy banki úshin eń mańyzdysy — zeınetaqy qarajatynyń naqty maqsatyna jumsalýyn qamtamasyz etý jáne ony zańsyz baıý quralyna aınaldyrmaý, — dedi Otbasy bank basqarma tóraıymy Lázzat Ibragımova.
BJZQ qarajatyn «Operatsııadan keıingi tyrtyqtardy jáne týa bitken aqaýlardy túzetýge arnalǵan rekonstrýktıvti jáne qalpyna keltirý (plastıkalyq) operatsııalary» maqsaty boıynsha paıdalaný úshin ótinim qabyldaý enpf-otbasy.kz portalynda 2025 jyldyń 12 jeltoqsanynan bastap toqtatylady.
Qazirgi ýaqytta plastıkalyq operatsııalarǵa BZQ qarajatyn paıdalaný boıynsha 6 294 ótinim qaralýda. Bul ótinimderdiń barlyǵy qoldanystaǵy tártipke sáıkes óńdeledi.
Sonymen qatar azamattarda ózderiniń zeınetaqy jınaqtarynyń bir bóligin ómirlik mańyzdy, quny joǵary jáne árdaıym qoljetimdi bola bermeıtin em túrlerine baǵyttaý múmkindigi saqtalady. Mundaı medıtsınalyq qyzmetterge mynalar jatady:
• sırek (orfandyq) aýrýlardy emdeý;
• radıonýklıdtik jáne radıoıod terapııasy;
• radıohırýrgııalyq emdeý;
• protondyq terapııa.
Budan bólek, azamattar zeınetaqy artylǵan qarajatty turǵyn úı jaǵdaıyn jaqsartýǵa paıdalana alady: turǵyn úı satyp alý, ıpotekany tolyq nemese jartylaı óteý, sondaı-aq Otbasy banktegi depozıtti tolyqtyryp, keıin baspana alý múmkindigi bar.
Taıaýda «Otbasy bank» pen Densaýlyq saqtaý mınıstrligi biryńǵaı jınaqtaýshy zeınetaqy qorynan azamattardyń jınaǵynyń bir bóligin tis emdeýge alýǵa shekteý qoıýǵa sheshim shyǵarǵan.