Budan bylaı polıtseıler Býrabaı tabıǵı aımaǵyn bıikten baqylaıdy
ASTANA. KAZINFORM — Polıtseıler Býrabaı tabıǵı aımaǵyn dronnyń kómegimen kúzetedi, dep habarlaıdy Polisia.kz.
Býrabaıdyń ásem tabıǵaty — halqymyzdyń baǵa jetpes baılyǵy. Osy tabıǵattyń tumsa sulýlyǵyn saqtaý maqsatynda óńirde tabıǵatty qorǵaý zańnamasyn saqtaý boıynsha qatań sharalar qolǵa alynýda.
Búginde erekshe qorǵalatyn tabıǵı aýmaqtardy qorǵaýda zamanaýı tehnologııalar keńinen paıdalanylyp keledi. Sonyń biri — áýe patrýldeýine arnalǵan drondar.
Drondar arqyly tabıǵı aımaqta zań buzýshylyqtardy anyqtaý men aldyn alý sharalary tıimdi júzege asýda. Jýyrda ǵana engizilgen bul ádis qazirdiń ózinde zańsyz balyq aýlaý men ańshylyq áreketterin tyıýda óz nátıjesin kórsetip úlgerdi.
Sonymen qatar órt oshaqtaryn anyqtap, der kezinde tıisti shara qoldanýǵa múmkindik beredi. 20 qarashada polıtseıler profılaktıkalyq reıd barysynda drondardy paıdalanyp, Kishi Chebache, Shýche jáne Býrabaı kólderiniń aýmaǵyn, sondaı-aq orman alqaptaryn tekserdi. Bul reıdtiń negizgi maqsaty — quqyq buzýshylyqtardy anyqtaý ǵana emes, sonymen birge kúzgi-qysqy mezgilde juqa muzda balyq aýlaýdyń qaýiptiligin eskertý, balyqshylardyń qujattary men qural-jabdyqtarynyń zańdylyǵyn tekserý.
Býrabaı aýdandyq tabıǵatty qorǵaý polıtsııasy tobynyń aǵa ınspektory, aǵa leıtenant Dýman Jýmanalınniń aıtýynsha, erekshe qorǵalatyn tabıǵı aýmaq mártebesi qyzmetkerlerge joǵary jaýapkershilik júkteıdi. Bıyl arnaıy mobıldi toptar 180-nen astam reıdtik is-shara ótkizip, ań aýlaý jáne balyq aýlaý erejelerin buzý boıynsha 200-ge jýyq quqyq buzýshylyqty anyqtap, jolyn kesken. Býrabaı tabıǵı qoryǵyn qorǵaý boıynsha jumystar «Býrabaı» memlekettik ulttyq tabıǵı parkimen birlesip júrgizilýde. Ulttyq parktiń qyzmetkerleri de reıdtik jáne profılaktıkalyq is-sharalarǵa belsendi qatysady.
Sonymen qatar ulttyq park aýmaǵynda jumys isteıtin zamanaýı beınebaqylaý júıeleri óz tıimdiligin dáleldedi. Qazirgi tańda ornatylǵan 13 beınebaqylaý munarasy shamamen 30 shaqyrym radıýsty qamtıdy jáne 360 gradýs kórinis usynady. Kameralar táýlik boıy jumys istep, tabıǵı keshenniń saqtalýyn baqylaýdy qamtamasyz etedi. Drondarmen ushqyshsyz áýe baqylaýy jáne beınekameralar arqyly monıtorıng júrgizý — Býrabaıdyń biregeı tabıǵatyn saqtaýda mańyzdy ról atqaryp otyr.
