Budan bylaı óńirlerde «Birtutas tárbıe» baǵdarlamasynyń jattyqtyrýshylary jumys isteıdi
ASTANA. KAZINFORM – QR Oqý-aǵartý mınıstrliginiń qoldaýymen 200-den astam pedagog «Birtutas tárbıe» baǵdarlamasynyń jańartylǵan mazmuny boıynsha oqýdan ótti.
Óńirlik bilim basqarmalary men ádistemelik kabınetter basshylarynyń orynbasarlaryna arnalǵan oqýdy Y.Altynsarın atyndaǵy ulttyq bilim berý akademııasy jáne «Órken» balalardyń ál-aýqatyn arttyrý ulttyq ǵylymı-praktıkalyq ınstıtýty uıymdastyrdy.
2023-2024 oqý jylynda «Birtutas tárbıe» baǵdarlamasy alǵash ret engizildi. Baǵdarlamany júzege asyrý aıasynda mektepterde ata-analardy pedagogıkalyq qoldaý ortalyqtary, «Meniń baýyrym» volonterler qozǵalysy qurylyp, «DosbolLike» – «Dostyq qolyńdy soz» naýqany bastaý aldy.
Bilim berý mekemelerinde 2,4 mıllıon stýdenttiń qatysýymen 22 túrli áleýmettik joba júzege asyryldy. Bıylǵy oqý jylynda bul bastamalar jańa formatta jalǵasatyn bolady.
Semınar barysynda «Tsıfrlyq qoǵam: ulttyń qundylyqtary men sapasy negizinde tárbıeleý», «Birtutas tárbıe» baǵdarlamasy: zertteýler men iske asyrý tetikteri», «Tsıfrlyq qoǵam jaǵdaıynda balalardyń qaýipsizdigin qamtamasyz etý jáne ómirsheńdigin damytý faktorlary», «Oqýshylardyń ulttyq tárbıesiniń erekshelikterin anyqtaý jáne jetildirý joldary» taqyryptarynda praktıkalyq sheberlik sabaqtar uıymdastyryldy.
«Birtutas tárbıe» baǵdarlamasynyń qazirgi bilim berý júıesi úshin ózektiligi men mańyzdylyǵy joǵary. Baǵdarlama qazirgi álemniń syn-qaterlerine daıyn jáne óz eliniń damýyna eleýli úles qosa alatyn azamattardyń jańa býynyn qalyptastyrýǵa baǵyttalǵan. Sondaı-aq Memleket basshysy atap kórsetken ádil qoǵam qurýǵa, jaýapty tulǵa qalyptastyrýǵa jáne progressıvti ultty damytýǵa baǵyttalǵan jańǵyrtý bastamalaryna sáıkes keledi», – dedi oqý-aǵartý vıtse-mınıstri Edil Ospan.
Aıta ketý kerek, respýblıkalyq semınar «Birtutas tárbıe» baǵdarlamasy aıasynda oqý-tárbıe protsesiniń sapasyn jaqsartýǵa yqpal etip qana qoımaı, pedagogter arasynda bilim men tájirıbe almasýdyń tıimdi alańyna aınaldy. Semınar sońynda barlyq qatysýshylarǵa óńirlerdegi tárbıe baǵdarlamasyn túsindirý boıynsha jattyqtyrýshy retinde dáris berýge ruqsat beretin sertıfıkattar tabystaldy.
