Budan bylaı mınıstrler men ákimderdi petıtsııa arqyly qyzmetinen alý múmkin emes
Mádenıet jáne aqparat vıtse-mınıstri Danııar Qadyrov Qazaqstanda qandaı taqyryptar boıynsha petıtsııa berýge bolmaıtynyn túsindirdi, dep habarlaıdy QazAqparat tilshisi.
Atap aıtqanda, búgin Senattyń jalpy otyrysynda «Qoǵamdyq baqylaý týraly» jáne «Qazaqstan Respýblıkasynyń keıbir zańnamalyq aktilerine qoǵamdyq baqylaý, ákimshilik rásimderdi jetildirý máseleleri boıynsha ózgerister men tolyqtyrýlar engizý týraly» zańdary maquldandy.
Bul qujattarda petıtsııa ınstıtýtyn reglamentteý jónindegi túzetýler qamtylǵan. Ýákiletti organ petıtsııa jarııa bolǵansha onyń zańda bekitilgen sharttarǵa sáıkestigin anyqtaıdy.
Bul rette basqarý nysanyn, respýblıkanyń ákimshilik-aýmaqtyq qurylymy men shekaralaryn, sot tóreligin, raqymshylyqty, ulttyq qaýipsizdikti jáne t.b. ózgertý sııaqty máseleler boıynsha petıtsııa berilmeıdi.
«Tyıym salynǵan» taqyryptardyń tizbesi konstıtýtsııalyq jáne qylmystyq quqyq, referendým týraly zań negizinde qalyptastyrylǵan.
«Ákimshilik-aýmaqtyq qurylym, shekara, til máselesi, konstıtýtsııalyq zańdar, arnaıy qyzmetterdiń jumysy qarastyrylmaıdy. Sonymen qatar, memlekettik qupııa sanatyndaǵy máseleler petıtsııada qaralmaıdy. Munymen qosa, Prezıdent, Parlamenttiń qos palatasy jáne Úkimettiń quzyretine kiretin laýazymdardy taǵaıyndaý men bosatý máseleleri qaralmaıdy. Óıtkeni bul taqyryp tıisti zańnama aıasynda iske asady. Atap aıtqanda, adamnyń quqyǵy men bostandyǵyna nuqsan ketiretin taqyryptar petıtsııada qaralmaıdy», - dedi Danııar Qadyrov Senattyń jalpy otyrysynan keıin tilshiler suraǵyna jaýap bere otyryp.
Onyń aıtýynsha, buǵan deıin petıtsııa ornalastyrý platformalary resmı bolmady.
Zań jobalary kúshine engen jaǵdaıda resmı aqparattyq platforma paıda bolady. Ol «e-ótinishte» jeke modýl bolyp belgilenedi.
Osy oraıda tilshiler vıtse-mınıstrden «qazaqstandyqtar tikeleı ákimder men mınıstrlerge qarsy petıtsııa bere ala ma?» dep surady.
«Bul máseleler zańda anyq kórsetilgen. Qarsy petıtsııa bere almaıdy. Óıtkeni konstıtýtsııalyq zań bar, Prezıdenttiń, Úkimettiń jáne Parlamenttiń qos palatasynyń konstıtýtsııalyq quqyqtary bar. Al basqa jaǵdaılarda usynýǵa bolady. Biraq Prezıdent, Parlamenttiń qos palatasy jáne Úkimet taǵaıyndaıtyn laýazymdar boıynsha petıtsııa jasalmaıdy», -dedi Danııar Qadyrov.
