Budan bylaı elge kelgen sheteldikter týrıstik jarna tólemeıdi
2022 jyly elimizdiń aýmaǵynda engizilgen sheteldikterge arnalǵan týrıstik jarna joıylady. Bul aqparatty Týrızm jáne sport mınıstrligi rastady, dep habarlaıdy Kazinform.
«QR Týrızm jáne sport mınıstriniń 2023 jyldyń 27 jeltoqsanyndaǵy № 347 buıryǵymen sheteldikterdiń týrıstik jarna tóleý erejesine ózgertýler engizildi. Oǵan sáıkes, Qazaqstannyń búkil aýmaǵynda nóldik stavka qoldanylady. Atalǵan buıryq ótken jyldyń 28 jeltoqsanynda Ádilet mınıstrliginde memlekettik tirkeýden ótti jáne ol resmı jarııalanǵan kúnnen keıin 10 kúntizbelik kún ótkennen keıin qoldanysqa engiziledi», — dep atap ótti mınıstrlikten.
Demek, 7 qańtardan bastap sheteldik týrıster jarna tóleýden bosatylady.
Esterińizge sala ketsek, 2022 jyly engizilgen týrıstik jarna — týrısterge jataqhanalardy, qonaq úılerdi, qalalar men aýdandardaǵy jalǵa beriletin turǵyn úılerdi qospaǵanda, týrısterdi ornalastyrý oryndarynda bolǵan árbir táýlik úshin alynatyn tólem.
Týrıstik operatorlar sheteldikter úshin alynǵan qarajatty jergilikti bıýdjetke aýdardy.
Jarna mólsherin ákimdikter 1-den 3 paıyzǵa deıingi mólsherde anyqtaıtyn.
