Bizge Kanada kerek emes, al Kanadaǵa AQSh qajet – Tramp
ASTANA. KAZINFORM — AQSh prezıdenti Donald Tramp Kanadany AQSh-tyń 51-shtaty etý týraly usynysyn taǵy da aıtty. Bul týraly Vashıngtondaǵy Kazinform agenttiginiń menshikti tilshisi Aq úı basshysynyń YouTube-te jarııalanǵan málimdemesine silteme jasap habarlaıdy.
Arızona shtatyndaǵy Býllhed-Sıtı qalasynda jaqtastarynyń aldynda sóz sóılegen Donald Tramp Kanadanyń tarıftik saıasatyn synǵa aldy.
— Kanada bizge burynnan beri ádiletsizdik jasap keledi, biraq endi bári ózgeredi. Olar tarıfter arqyly bizdi qanap, taýarlarymyzǵa baj salyǵyn saldy. Alaıda bul týraly jaq ashpaıdy. Olardyń mundaı áreketine budan bylaı tózbeımiz, — dedi Donald Tramp.
Donald Tramp AQSh-tyń Kanadaǵa qoldaý kórsetýge shamadan tys qarjy jumsap otyrǵanyn alǵa tartyp, Kanadany AQSh-tyń 51-shtaty etý ıdeıasyn usyndy.
— Túptiń túbinde Kanada AQSh-tyń 51-shtaty bolady. Óıtkeni bul — máseleni sheshýdiń jalǵyz joly. Bizge Kanada kerek emes, al Kanadaǵa AQSh qajet. Endeshe, óz quramymyzǵa kirmeıtin eldi qoldaýǵa jyl saıyn 80-90 mıllıard dollar jumsaýdyń ne qajeti bar? — dedi Donald Tramp.
Eske salaıyq, buǵan deıin AQSh prezıdenti Donald Tramp bolashaqta Kanadanyń AQSh quramyna kiretinine senimdi ekenin málimdegen edi.
