Budan bylaı Atyraýdan Astrahanǵa 2 saǵatta jetýge bolady
ASTANA. KAZINFORM — Eń iri «Atyraý-Astrahan» jol jobasynyń qurylysy aıaqtaldy, dep habarlaıdy «QazAvtoJol» UK.
«QazAvtoJol» UK respýblıkalyq mańyzy bar «Atyraý — RF shekarasy (Astrahanǵa) avtomobıl jolyn qaıta jańartý boıynsha negizgi jumystardyń aıaqtalǵany týraly habarlaıdy. Jol ýchaskesiniń uzyndyǵy 272 shaqyrym.
Joldy jańartý jumystary 2018 jyly bastalyp, Eýropalyq qaıta qurý jáne damý bankiniń nesıesi esebinen júzege asyryldy. Qaıta jańartý jumystarynan keıin jol úshinshi tehnıkalyq sanattan ekinshi sanatqa aýystyryldy.
Ár baǵytta eni 3,75 metrden turatyn eki jolaqty qozǵalysy bar jol salyndy. Joba aıasynda 6 kópir, 1 jolótpe, 60 sý ótkizgish qubyr men 10 demalys alańdary abattandyryldy.
Sondaı-aq, 650 jaryq tiregi ornatylyp, jol paıdalanýshylar úshin qolaıly ári qaýipsiz qozǵalysty qamtamasyz etildi. Qaıta jańartý jumystary halyqaralyq standarttarǵa sáıkes salynyp, jobany júzege asyrýǵa Qazaqstan, Italııa, Túrkııa men Ázerbaıjan elderiniń kompanııalary qatysty. Atalmysh jumystarǵa 650 maman men 450 birlik arnaıy tehnıka jumyldyryldy.
— Aqtóbe (Muǵaljar) jáne Mańǵystaý (Shetpe) oblystarynan temirjol arqyly 3,4 mln tonna ıntertti materıal jetkizilip, jumys barysynda qoldanyldy. Inertti materıaldardy tasymaldaýǵa 50 myńǵa jýyq jarty vagon jáne bıtým tasymalyna 2,5 myń bıtým tasyǵysh qajet boldy. Osy ýaqytta deıin bul ýchaske arqyly jol júrý ýaqyty 5 saǵat bolsa, al qazir búkil marshrýtty júrip ótý úshin 2 saǵat ketedi, — delingen kompanııa habarlamasynda.
Bul joba barysynda salynǵan sapaly jol jabyny men zamanaýı ınfraqurylymnyń nátıjesinde júzege asýda. Atyraý-Astrahan avtomobıl jolyn qaıta jańartý boıynsha jumystardyń aıaqtalýy aımaqtyń kólik ınfraqurylymynyń damýyna jáne Qazaqstan men Reseı arasynda baılanysty kúsheıtip, ekonomıkanyń damýyna jáne halyqaralyq saýdanyń damýyna septigin tıgizbek.
Eske salsaq, buǵan deıin «QazAvtoJol» joldyń taıǵaqtyǵyna shaǵymdanǵan júrgizýshilerge jaýap berdi.