Budan ári ystyq kúsheıe túsedi: ǵalymdar Kúnniń buryn-sońdy bolmaǵan belsendiligin tirkep otyr
ASTANA. Tamyzdyń 6-sy. QazAqparat - Bıylǵy jazdaǵy aýa raıynyń tosyn minezi Kúnniń uıqydan oıanýymen baılanystyrylýda.
ITAR-TASS-tyń brıtandyq New Scientist ǵylymı aptalyǵyna silteme jasap habarlaýynsha, álemniń jetekshi astrofızıkalyq observatorııalary tamyzdyń 1-inde kún betinde eki alyp alaý jarq ete túskenin baıqaǵan. Olardan eki qýatty jarylys paıda bolyp, asa kúshti energııa shyǵarǵan. Mamandar muny naǵyz ǵaryshtyq tsýnamıǵa teńep otyr, dep habarlaıdy RBK agenttigi.
Kúnniń ádettegiden tys 9 jyldyq kezeńdegi tynyshtyǵynan keıin onyń aıaq astynan belsendiligi kúrt ósip ketti. Jaǵdaıdyń ádettegiden tys bolýy, ǵalymdardyń aıtýynsha, Kúnnen taralǵan ystyq sáýle aǵyny Jerge qaraı baǵyttalǵan. Alǵashqy qýatty kún energııasy bizdiń ǵalamsharymyzda tamyzdyń 4-inde boldy.
Ǵalymdardyń aıtýynsha, aldaǵy birneshe táýlikte taǵy da jańa qýatty kún energııasy tolqyndarynyń kelýi kútilýde. Osy tsýnamımen betpe-bet kelgen álem aımaqtary men elderinde tabıǵı kataklızmder paıda bolýy múmkin.
Reseı Gıdrometeoortalyǵynyń boljamdaryna qaraǵanda, taıaýdaǵy kúnderde birqatar aımaqtarda tabıǵattyń mundaı tosyn minezi saqtalady.
Reseı astanasyndaǵy jaǵdaı kúrdeli bolyp qalýda - aımaqty taǵy da órtten taralǵan ys tumshalap aldy. Tamyzdyń 6-synda Máskeýdegi aýa raıynda zııandy zattardyń shoǵyrlanýy qalypty jaǵdaıdan birneshe ese arta tústi. Atap aıtqanda, aýadaǵy tútin ıisi normadan tórt ese joǵary, dep habarlaıdy ITAR-TASS.
Ásirese Máskeýdiń shyǵysy men ońtústik-shyǵysyndaǵy ekologııalyq jaǵdaı kúrdeli. Búgin munda shamaly jańbyr jaýyp ótti, biraq ta jaǵdaıdy túbegeıli ózgerte alǵan joq.
Máskeýdiń kóptegen aýdandary tútinge tumshalansa da, zııandy zattardyń shoǵyrlanýy rekordtyq kórsetkishke jetken tamyzdyń 4-indegi jaǵdaıǵa qaraǵanda báseń. Ekologtar kóshege shyqqanda sýlanǵan maqta-dákeniń kópqabatty tumshalary arqyly demalýǵa keńes berýde.
