Budan 3 jyldan astam ýaqyt buryn jóndeýge jabylǵan BQO teatry qashan ashylady

Atalmysh jumystyń osynshama ýaqytqa sozylýy jurtshylyq tarapynan jıi synǵa ilinip keledi. 

Kazinform tilshisi tıisti mekemelerge jolyǵyp, máseleniń jaı-japsaryn anyqtap kórdi.
BQO mádenıet, tilderdi damytý jáne arhıv isi basqarmasy basshysynyń ýaqytsha mindetin atqarýshy Medhat Qambetovtiń málim etkenindeı, memlekettik satyp alý boıynsha ashyq konkýrstyń qorytyndysy 2023 jyly 18 sáýirde shyqty. Soǵan sáıkes 2023-2024 jyldarǵa arnalǵan qurylys-jóndeý jumystaryn oryndaý úshin jalpy somasy 737,7 mln teńgege «Órken-Servıs» JShS-men shart jasaldy.

Onyń sózine qaraǵanda, jobany iske asyrý barysynda Batys Qazaqstan oblysy boıynsha Іshki memlekettik aýdıt departamenti merdigerde tıisti lıtsenzııanyń bolmaýyna baılanysty shartty jaramsyz dep taný týraly talap-aryzben sotqa júgindi.

Sot talqylaýy alty aıǵa sozylyp, sonyń nátıjesinde nysandaǵy qurylys jumystary toqtatyldy. Oblystyq sottyń 2024 jylǵy 10 sáýirdegi qaýlysymen tapsyrys berýshi men merdiger arasyndaǵy shart buzyldy.

Aıta ketý qajet, joba 2021 jyly ázirlengen. Alaıda 2024 jylǵy maýsymda jobalaý-smetalyq qujattamanyń qoldanylý merzimi aıaqtalýyna baılanysty jańa qujattama ázirleý qajettiligi týyndady.

Teatr ǵımaratyn kúrdeli jóndeý jumystary 2025 jylǵy maýsymda qaıta bastaldy. Bas merdiger bolyp «Kúmbez» JShS belgilendi. Jańa jobalaý-smetalyq qujattamaǵa sáıkes jobanyń jalpy quny 2,16 mlrd teńge boldy. Búgingi kúnge deıin 1,36 mlrd teńge ıgerildi. Qazirgi ýaqytta nysannyń daıyndyǵy – 83 paıyz. 

- Qalǵan negizgi jumystar – kórermender zalyna parket tóseý jáne balkon qorshaýlaryn ornatý. Buǵan qarajat bólindi. Qajetti jabdyqtar men qurylys materıaldary nysanǵa jetkizilgen boıda montajdaý jáne ornatý jumystary júrgiziledi. Jasalǵan shartqa sáıkes kúrdeli jóndeý jumystaryn aıaqtaý 2026 jylǵy jeltoqsanǵa josparlanǵan. Jobanyń iske asyrylý barysy Batys Qazaqstan oblysy ákimdiginiń turaqty baqylaýynda, - deıdi M.Qambetov. 

Basqarma derekterine sáıkes ǵımarattyń jóndelýi kezinde teatrdyń shyǵarmashylyq jumysy toqtaǵan joq. Qoıylymdar A.Ostrovskıı atyndaǵy orys drama teatrynda, oblystyq halyq shyǵarmashylyǵy men «Ádilet» partııasynyń zaldarynda, «Zenıt» mádenıet úıinde ótkizildi. 

Úsh jyl ishinde 535 spektakl qoıylyp, 11 premera ótkizilip, 77 750 kórermen qamtyldy. Sonymen qatar teatrdyń Astana, Almaty, Shymkent, Atyraý, Aqtaý jáne Petropavl men Qyrǵyzstannyń Bishkek qalasyna gastoldik saparlary uıymdastyrylyp, ujym 8 respýblıkalyq jáne halyqaralyq festıvalderge qatysty.

Teatr dırektory Nurjan Tasbolatovtyń naqtylaýynsha, jańa maýsymǵa daıyndyq jumystary ǵımarattyń ishinde júrgizilýde. 

- Teatr ártisteri qyrkúıek aıynan beri josparǵa sáıkes aýdandarda, qalanyń ózindegi oqý oryndarynda spektaklderin qoıyp júr. Jańa maýsymdy óz teatrymyzda ashýdy kózdep otyrmyz. Oǵan qosa Almaty qalasynda «Alataý» dástúrli óner teatrynyń 10 jyldyǵyna oraı 15-20 qarashada ótetin respýblıkalyq festıvalge shaqyrtý aldyq. Almaty kórermenderine jazýshy Saıymjan Erkebaevtyń «Gúlge umtylǵan ekeý» dramasyn usynbaqshymyz, - dedi N.Tasbolatov. 

Batysqazaqstandyq jazýshy, «Parasat» ordeniniń jáne halyqaralyq «Alash» ádebı syılyǵynyń ıegeri Darıǵa Mushtanova teatr qaıta paıdalanýǵa berilse, bul kórermender úshin úlken qýanysh ekendigin jetkizdi.

- Teatrdyń jóndelýi «qazannyń túbine tas túsip ketkendeı» boldy ǵoı. Bul jerde men halyq pen teatrdyń birligin kórdim. Ártister tentirep júrip te jańadan qoıylymdaryn qoıdy. 

Kórermender de qoldap, qaı jerde spektakl bolsa, sol jerden tabyldy. Osy ýaqyt ishinde teatrdyń tabandylyǵy men ónerge degen adaldyǵy ujymnyń básin kótere túskendeı boldy.

Endi teatrda qansha qoıylym bolsa, bireýin de qaldyrmaı kórýge beıilmiz. Sony asyǵa kútip júrmiz, - dedi D.Mushtanova. 

Eske sala keteıik, budan buryn BQO-da qazaq teatryn jóndeýge 1 mlrd teńgege jýyq qarjynyń artyq qaralǵany anyqtalǵanyn jazǵan edik.