Býchadaǵy jaǵdaı boıynsha BUU aıasynda tergeý júrgizý kerek – Máýlen Áshimbaev

NUR-SULTAN. QazAqparat – Senat tóraǵasy Máýlen Áshimbaev Ýkraınanyń Býcha qalasyndaǵy oqıǵaǵa qatysty pikir bildirdi, dep habarlaıdy QazAqparat tilshisi.

Senattyń jalpy otyrysynan keıin tilshiler palata spıkerinen Ýkraınanyń Býcha qalasyndaǵy oqıǵaǵa qatysty Qazaqstannyń ustanymyn surady.

«Bárimiz buqaralyq aqparat quraldarynan da, áleýmettik jelilerden de Býchadaǵy jáne basqa da eldi mekenderde bolǵan jańdaıdy kórip jatyrmyz. Býchadaǵy jaǵdaı – úlken tragedııa. Ýkraına tarapy genotsıd dep aıtyp jatqanyn estip jatyrmyz. Al Reseı tarapy buny istemegenin alǵa tartýda. Sol sebepti halyqaralyq uıymdardyń aıasynda, BUU aýqymynda komıssııa quralady degen oıdamyn. Sol komıssııa obektıvti túrde jan-jaqtan aqparatty jınap, adamdarmen kezdesip, sol jerge baryp, halyqaralyq qaýymdastyqqa málimet bergeni durys. Beıbit adamdar qaza boldy. Sondyqtan bul jaǵdaı «qalaı boldy, nege boldy» degen suraqtar aıasynda halyqaralyq uıymdardyń qatysýymen anyqtalý kerek», - dedi Senat tóraǵasy.

Osy oraıda M. Áshimbaev bul oqıǵaǵa qatysty emotsııaǵa salynbaı, BUU aıasynda úlken tergeý jumystaryn júrgizgen oryndy bolatynyn atap ótti.

«Mundaı máselelerge qatysty halyqaralyq konventsııalar da, halyqaralyq sharttar da bar. Bul turǵyda BUU aıasynda tıisti jumystar uıymdastyrylǵany durys bolatyny sózsiz. Qazaqstannyń resmı pozıtsııasyn Syrtqy ister mınıstrligine suraý salyp, solardan alǵandaryńyz durys bolady. Jaqynda Prezıdentimiz óz maqalasynda aıtyp ketkendeı, biz Ýkraınanyń terrıtorııalyq tutastyǵyn syılaımyz. Bul jerde pozıtsııamyz anyq. Sońǵy aıda bul máseleni birneshe ret Prezıdent te, Syrtqy ister mınıstri de aıtty», - dedi Senat tóraǵasy.

Aıta keteıik, dúısenbide Máskeý Býchadaǵy jaǵdaıǵa baılanysty BUU Qaýipsizdik keńesiniń otyrysyn shaqyrýdy talap etti.