Býblıksiz ótedi: Qazaqstan quramasy Devıs kýbogindegi mańyzdy match aldynda túsinikteme berdi

BAQ ókilderimen kezdesý barysynda Qazaqstan quramasynyń kapıtany komandanyń daıyndyǵy týraly aıtyp, qarsylastyń myqty tustaryna baǵa berdi, quramdy jasaqtaý máselesine jáne jas tennısshilerdiń bolashaǵyna toqtaldy.

Dıas Dosqaraevtyń aıtýynsha, ulttyq qurama aldaǵy kezdesýdiń mańyzdylyǵyn tolyq túsinedi jáne álemdik tennıs elıtasyna qaıta oralýdy maqsat etip otyr.

— Bizdi ońaı kezdesý kútip turǵan joq. Devıs kýbogynda jarystyń qaı kezeńi bolmasyn, osal qarsylas bolmaıdy. Kapıtan retinde quramamyzdy ózine laıyqty deńgeıge qaıta kóterý jáne komandamyzǵa árdaıym tán bolǵan erekshe atmosferany qalpyna keltirý jolynda zor jaýapkershilik sezinemin. Barlyq oıynshylar aldaǵy kezdesýdiń mańyzdylyǵyn túsinedi, daıyndyqqa jaýapkershilikpen qarap, ortaq maqsatqa jetý úshin bar kúsh-jigerin jumsap jatyr. Tolyqqandy daıyndyqqa jetkilikti ýaqyt bolý úshin biz aldyn ala jınaldyq. Bizdiń mindetimiz — sapaly tennıs kórsetip, jeńiske jetý, — dedi Dosqaraev.

Kapıtan Taıland quramasyna da erekshe toqtaldy. Onyń aıtýynsha, qazaqstandyq tennısshiler halyqaralyq týrnırlerdegi kezdesýler arqyly qarsylas komandanyń birqatar oıynshylaryn jaqsy biledi.

— Biz Taıland quramasymen Azııa jáne Okeanııa aımaǵynda óner kórsetemiz, sondyqtan olardyń oıynshylarynyń múmkindikterin jaqsy bilemiz. Ásirese Kasıdıt Samreıge nazar aýdarý qajet. Qazirgi ýaqytta álemdik reıtıngtiń tórtinshi júzdiginde turǵanyna qaramastan, ol qaýipti qarsylas, ásirese jyldam jabyndyda jaqsy oınaıdy. Sondaı-aq Qazaqstanǵa Challenger serııasyndaǵy týrnırlerge birneshe ret kelgen Maksımýs Djonsty da jaqsy bilemiz. Qarsylas quramynda tájirıbeli juptyq oıynshy Prýchıa Isaro bar. Onyń múmkindikterin bizdiń jattyqtyrýshymyz Aleksandr Nedovesov jaqsy biledi. Biz Taıland quramasynyń árbir tennısshisine úlken jaýapkershilikpen qaraımyz jáne jeńiske jetý úshin barynsha jınaqy oınaý qajet ekenin túsinemiz, — dep atap ótti kapıtan.

Baspasóz konferentsııasynyń negizgi taqyryptarynyń biri ulttyq quramany jasaqtaý máselesi boldy. Dıas Dosqaraev komanda quramyn anyqtaý kezinde tennısshilerdiń qazirgi sporttyq babyn ǵana emes, ulttyq quramanyń uzaq merzimdi damý perspektıvasyn da eskerý mańyzdy ekenin túsindirdi.

— Biz Devıs kýbogynda óner kórsetý tájirıbesi bar birneshe oıynshydan turatyn, quramy tereń ári básekege qabiletti komanda jasaqtaýǵa umtylamyz. Biz úshin sapaly rezervtiń bolýy jáne qarsylas pen naqty jaǵdaıǵa baılanysty quramdy ózgertý múmkindigi óte mańyzdy. Biz Tımofeı Skatovqa senim artamyz jáne onyń ulttyq qurama sapyndaǵy tabysty serııasyn jalǵastyratynyna úmittenemiz. Sonymen qatar oıynshylarǵa jaýapty kezdesýlerde tájirıbe jınaýǵa múmkindik berý qajet. Eger quramǵa Aleksandr Býblık engizilgende, ol bul kezdesýde mindetti túrde óner kórseter edi. Alaıda mundaı jaǵdaıda Tımofeı Skatovtyń jekeleı synda oınaý múmkindigi shekteler edi. Biz tek bir matchty ǵana emes, ulttyq quramanyń bolashaǵyn da oılaýymyz kerek, — dep túsindirdi Dosqaraev.

Kapıtan qazaqstandyq jas tennısshilerdiń áleýetine de toqtaldy.

— Bizde talantty oıynshylardyń jaqsy býyny ósip keledi. Amır Omarhanov, Danıal Rahmatýllaev, Zangar Nurlanuly jáne Damır Jalǵasbaıdyń áleýeti joǵary. Alaıda jas tennısshilerge eresekter týryna beıimdelip, tájirıbe jınaý jáne ulttyq qurama sapynda turaqty óner kórsetýge múmkindik beretin deńgeıge birtindep jetý úshin ýaqyt qajet, — dep qosty ol.

Jekeleı jáne juptyq kezdesýlerde kimderdiń kortqa shyǵatyny týraly suraqqa jaýap bergen Dosqaraev túpkilikti sheshim áli qabyldanbaǵanyn aıtty.

— Jekeleı synda Aleksandr Shevchenko men Tımofeı Skatovtyń kandıdatýralaryn qarastyryp jatyrmyz. Ekeýi de oınaýǵa daıyn, alaıda sońǵy sheshimdi olardyń qazirgi jaǵdaıy men daıyndyq nátıjelerin eskere otyryp qabyldaımyz. Juptyq kezdesýge keletin bolsaq, birneshe nusqany qarastyryp otyrmyz. Jyldam jabyndyda Beıbit Jýkaevtyń komandaǵa kómektese alatyn qasıetteri bar. Yqtımal juptardyń qatarynda Denıs Evseev pen Beıbit Jýkaev, sondaı-aq Tımofeı Skatov pen Aleksandr Shevchenko bar. Budan bólek, Amır Omarhanovty da quramǵa kezdeısoq shaqyrǵan joqpyz. Ol jekeleı de, juptyq ta synda óner kórsete alatyn ámbebap tennısshi. Quram boıynsha túpkilikti sheshimdi matchtar qarsańynda qabyldaımyz, — dedi kapıtan.

Baspasóz konferentsııasy barysynda jýrnalıster jaraqatyna baılanysty uzaq ýaqyt jarystarǵa qatyspaǵan Beıbit Juqaevtyń fızıkalyq jaǵdaıy týraly da surady.

— Beıbit kún saıyn babyna kelip jatyr. Onyń tobyq tusynan alǵan jaraqaty kúrdeli boldy jáne qalpyna kelýine biraz ýaqyt qajet boldy. Qazir biz onyń fızıkalyq jáne psıhologııalyq turǵydan oń ózgeristerge qol jetkizip jatqanyn kórip otyrmyz. Ol birtindep óziniń ońtaıly sporttyq babyna qaıta orala alatynyna senimdimin. Alda ony Azııa oıyndary da kútip tur. Sondyqtan onyń babyn odan ári jaqsartyp, jarystarǵa jaqsy jaǵdaıda kelýi mańyzdy, — dep atap ótti Dosqaraev.

Kapıtan sondaı-aq qazaqstandyq bolashaǵy zor tennısshilerdiń biri Amır Omarhanovtyń ulttyq qurama sapyndaǵy debıýti týraly pikir bildirdi.

— Jasóspirimder tennısinen eresekter deńgeıine aýysý árdaıym fızıkalyq júktemeniń aıtarlyqtaı artýymen qatar júredi. Amırde osy kezeńde jeńil jaraqattar paıda boldy, sondyqtan biz onyń jaǵdaıyna muqııat qaraýymyz kerek. Devıs kýbogynda jas tennısshilerge týrnırlik turǵydan sheshýshi mańyzy joq matchtarda oınaýǵa múmkindik beriletin jaǵdaılar bolady. Bul olardyń daıyndyǵyn tekserýge jáne ulttyq qurama sapynda qajetti tájirıbe jınaýyna jaqsy múmkindik. Alaıda biz Amırdiń debıýti úshin onyń densaýlyǵyna qaýip tóndirgimiz kelmeıdi. Onyń tolyq qalpyna kelýi, damýyn jalǵastyrýy jáne álemdik reıtıngtegi ornyn nyǵaıtýy biz úshin mańyzdy. Ol daıyn bolǵan kezde, kortqa shyǵý múmkindigin mindetti túrde qarastyramyz, — dep túıindedi kapıtan.

Eske salaıyq, Devıs kýbogynyń Ekinshi álemdik tobynyń pleı-off kezeńi aıasyndaǵy Qazaqstan men Taıland arasyndaǵy match 18–19 qyrkúıekte Astanadaǵy Beeline Arena Ulttyq tennıs ortalyǵynyń korttarynda ótedi. Birinshi oıyn kúnindegi kezdesýler saǵat 13:00–de, ekinshi kúngi matchtar saǵat 12:00–de bastalady.

Qazaqstan quramasyna Aleksandr Shevchenko, Denıs Evseev, Tımofeı Skatov, Beıbit Jýkaev jáne Amır Omarhanov endi. Komanda kapıtany — Dıas Dosqaraev.

Bul kezdesýdiń jeńimpazy Devıs kýbogynyń Birinshi álemdik tobynda óner kórsetý quqyǵyna ıe bolady.

Aıta keteıik, Qazaqstannyń birinshi, álemniń 16-raketkasy Aleksandr Býblık AQSh ashyq chempıonatynyń tórtinshi aınalymyna shyǵa almady. Qazaqstandyq tennısshi úshinshi aınalymda álemniń 21-raketkasy, amerıkalyq Tommı Polmen sheberlik baıqasqan bolatyn.

Qazaqstandyq tennısshi Elena Rybakınanyń álemdik arenadaǵy jetistikteri eldegi balalar tennısine de áser etkenin jazdyq.