Býblık, Vavrınka, Tım, Korda tennısten Astanadaǵy álemdik týrnırge qatysady

ASTANA. QazAqparat – Bul kúnderi Qazaqstan astanasy tennısten ATP sanatyndaǵy eń iri týrnırlerdiń birin ótkizýge daıyndalyp jatyr. Álemdik deńgeıdegi jarysqa tanymal tennısshiler qatysady dep josparlanǵan, dep habarlaıdy QazAqparat.

QR Tennıs federatsııasynyń málimetine súıensek, elimizdegi baıraqty dodaǵa qatysatyndaryn birqatar sportshy rastaǵan. Olar:

- ATP reıtıngisinde 26-satyda turǵan Qazaqstannyń birinshi raketkasy, jýyrda ǵana Germanııanyń Galle qalasynda máresine jetken ATR 500 týrnıriniń jeńimpazy Aleksandr Býblık;

- «Úlken dýlyǵa» sanatyndaǵy eń iri úsh týrnırdiń jeńimpazy, Olımpıada chempıony, ATP sanatyndaǵy 19 týrnırdiń jeńimpazy, «Devıs kýboginiń» ıegeri, álemniń burynǵy úshinshi raketkasy, shveıtsarııalyq Sten Vavrınka;

- birqatar iri jarystyń jeńimpazy, álemniń eks-úshinshi raketkasy, aýstrııalyq Domınık Tım;

- jastar arasyndaǵy «Úlken dýlyǵa» týrnıriniń jeńimpazy, jastar arasyndaǵy álemniń burynǵy birinshi raketkasy, qazirgi tańda eresekter arasyndaǵy reıtıngide 32-orynda turǵan amerıkalyq Sebastıan Korda.

Aıta keteıik, ATP 250 sanatyndaǵy ASTANA OPEN týrnıri Astanada bıyl úshinshi márte uıymdastyrylmaq. Bul týrnır buǵan deıin elimizde 2020 jáne 2021 jyldary ótkizilse, byltyr Qazaqstan tennıs tarıhynda alǵash ret ATR 500 serııaly jarystyń jalaýy jelbiregen edi.

Júlde qory 1 017 860 AQSh dollaryn quraıtyn týrnır elordadaǵy Ulttyq tennıs ortalyǵynda 26 qyrkúıek pen 3 qazan aralyǵynda ótedi.