Býblık nege Almatyda oınamaı, artynsha basqa týrnırge qatysty – federatsııa jaýaby

ALMATY. KAZINFORM – Áleýmettik jelilerde keıingi kúnderi Qazaqstannyń birinshi, álemniń 16-raketkasy Aleksandr Býblıktiń Almaty Open ATP 250 týrnırine qatyspaýy qyzý talqylanyp jatyr.

Jankúıerler Býblıktiń bul sheshimin túsinbeı dal. Sebebi ol Almatydaǵy týrnırge jaraqatyna baılanysty qatyspaǵanymen, arada bir apta ótpeı Venadaǵy jarysta kortqa shyqqan.

Qazaqstan tennıs federatsııasy Kazinform tilshisine osy jaǵdaıǵa qatysty túsinik berdi.

Federatsııanyń málimetinshe, sportshy Hanchjoý qalasynda ótken ATP 250 týrnıriniń fınalynda jaraqat alǵan. Sol jaraqat oǵan keıingi Beıjiń men Shanhaı jarystarynda tolyqqandy oınaýǵa múmkindik bermeı, tennısshi alǵashqy aınalymdarda jeńilip qalǵan.

– Aleksandr úshin Almatydaǵy týrnır erekshe mańyzǵa ıe edi. Ol bul jarysqa qatty qatysqysy kelgen. Degenmen jaraqatty asqyndyryp almaý úshin osyndaı sheshim qabyldandy, - delingen jaýapta.

Federatsııa ókilderi medıtsınalyq qorytyndymen tanysqanyn rastady.

– Medıtsınalyq shtab Aleksandrǵa jattyǵýlar men oıyndardy azaıtyp, tolyq tekserýden ótýdi usyndy. Dárigerler oǵan artqy jambas bulshyqetteriniń jaraqaty degen dıagnoz qoıdy, - dep túsindirdi Qazaqstan tennıs federatsııasy.

Jankúıerlerdiń basty suraǵy – jaraqaty bolsa, nege tennısshi osy aptada Venadaǵy týrnırge qatysa aldy ?

Bul suraqqa uıym:

– Aleksandr jaraqatynan aıyqqan soń reıtıng upaılaryn kóbeıtý úshin Venadaǵy jarysqa qatysýdy jón sanady, - dep jaýap berdi.

Federatsııa áleýmettik jelidegi syn men reaktsııany «qalypty qubylys» dep qabyldap otyr.

– Árıne, biz jaǵdaıdy baqylap otyramyz, beı-jaı qaramaıtyn áleýmettik jeli aýdıtorııasy bul jaǵdaıdy synı turǵydan qabyldaǵanyn túsinemiz. Biz barlyq pikirge qurmetpen qaraımyz. Degenmen sportshy úshin deniniń saýlylyǵy mańyzdy, sondyqtan barlyq nıýansty eskerý mańyzdy, - delingen jaýapta.

Sondaı-aq uıym el atynan oınaıtyn tennısshilerdiń el ishindegi týrnırlerge qatysýy jóninde eshqandaı kelisimsharttyq mindetteme joq ekenin atap ótti.

– Olar – Qazaqstan azamattary. Qaı jarysta oınaý ár sportshynyń óz erki, - dep túıindedi federatsııa.

Aıta keteıik, qazir Aleksandr Býblık Aýstrııa astanasy Venadaǵy ATP 500 týrnırinde óner kórsetip jatyr. Ol alǵashqy matchta chılılik Alehandro Tabılony 6:4, 6:4 jeńdi, endi argentınalyq tennısshi Fransısko Serýndolomen sheberlik baıqasady.

Eske salaıyq, Almatydaǵy ATP 250 týrnırinde jekeleı synda álemniń 14-raketkasy, reseılik Danııl Medvedev jeńiske jetti. Ol óz sporttyq jolynda ATP jarystarynda qyrqynshy ret fınalǵa shyǵyp, 21-tıtýlyn jeńip aldy.

Al juptyq synda frantsııalyqtar Teo Arrıbaj ben Albano Olıvettı úzdik shyqty.