«Býaloı» taıfýnynyń Vetnamǵa keltirgen shyǵyny 518 mıllıon dollarǵa baǵalandy

ASTANA.KAZINFORM — Vetnamda bıyl 10-shy ret soqqan «Býaloı» daýylynyń saldarynan 49 adam qaza taýyp, 16 adam iz-tússiz joǵalyp ketti. Taǵy 153 adam zardap shekti, dep habarlaıdy Sınhýa.  

Taıfýn 200 úıdi qıratyp, 169 myńnan astam úıdi zaqymdady, taǵy 64 800 úıdi sý basty. 80 600 gektardan astam kúrish jáne basqa da egistik alqaby sý astynda qalyp, 21 myńnan astam mal men 500 myńǵa jýyq qus qyryldy.

Taıfýn kóptegen qoǵamdyq ınfraqurylym nysandaryn zaqymdady. Sý tasqyny men kóshkin 7500-den astam joldy jaýyp tastady.

Bılik zalal kólemin baǵalaýdy, mańyzdy qyzmetterdi qalpyna keltirýdi jáne zardap shekken turǵyndarǵa kómek kórsetýdi jalǵastyryp jatyr.

Aldyn ala ekonomıkalyq shyǵyn 12,8 trıllıon dongqa (shamamen 518 mıllıon dollar) baǵalandy.

Buǵan deıin Vetnamda «Býaloı» taıfýny 34 adamnyń ómirin qıǵany habarlanǵan bolatyn.