Bý qazandyǵyndaǵy jarylys: Adam ólimine qatysty qylmystyq is qozǵaldy
KÓKShETAÝ. QazAqparat - Aqmola oblysynda adam ólimine alyp kelgen bý qazandyǵynyń jarylýyna baılanysty qylmystyq is qozǵaldy, dep habarlaıdy QazAqparat tilshisi aýmaqtyq ІІD baspasóz qyzmetine silteme jasap.
«Zerendi aýdany Prırechnoe aýylynyń 50 jastaǵy turǵynynyń bý qazandyǵy jarylýy saldarynan opat bolýyna baılanysty QR QK 156 babynyń 3 bóligi (eńbekti qorǵaý erejesiniń buzylýy) boıynsha is qozǵalyp, sotqa deıingi tergeý amaldary júrgizilýde», - delingen Aqmola oblysy boıynsha ІІD baspasóz qyzmetiniń habarlamasynda.
Vedomstvonyń deregi boıynsha tergeý amaldary sheńberinde birqatar saraptamalar taǵaıyndaldy.
Eske sala keteıik, qarashanyń 23-i kúni saǵat 16:20-da Zerendi aýdanynyń Prırechnoe aýylyndaǵy JShS-niń birine tıesili ǵımarattyń bý qazandyǵy jaryldy. Saldarynan 50 jastaǵy jergilikti turǵyn kóz jumdy. Taǵy eki adam túrli dene jaraqatymen Aqmola oblystyq aýrýhanasyna jatqyzyldy.
