BTS álemdik týry: 75 eldegi kórermen kınoteatrdan tikeleı efırde tamashalaı alady

ASTANA. KAZINFORM — Ońtústik koreıalyq boızbend BTS jańa «Arirang» álemdik týrynyń ashylý kontserti tikeleı efırin Ońtústik Koreıa men basqa elderdegi kınoteatrlarda kórsetedi, dep habarlaıdy Yonhap.

BigHit Music agenttiginiń málimetinshe, alǵashqy kórsetilimder 11 sáýirde Seýl mańyndaǵy Goıanda jáne 18 sáýirde Tokıoda ótedi. Kontsertter 75 eldegi 3500-den astam kınoteatrda kórsetilmek. Keıbir aımaqtarda translıatsııa ýaqyt aıyrmashylyǵyna baılanysty keıinge qalýy múmkin.

«Arirang» týry K-pop tarıhyndaǵy eń iri týr bolady: 34 qalada 82 kontsert josparlanǵan. Soltústik Amerıka men Eýropadaǵy barlyq 41 shoý, sondaı-aq Goıandaǵy kontsertter bıletteri tolyq satylǵan.

BTS alǵashqy koreı toby retinde álemdik stadıondarda jeke kontsertter ótkizedi: Raymond James Stadium (Tampa), Stanford Stadium (Kalıfornııa), AT&T Stadium (Arlıngton) jáne Allianz Arena (Mıýnhen).

Londonda top eki kún qatarynan — 6 jáne 7 shildede Tottenham Hotspur stadıonynda 120 myń kórermen aldynda óner kórsetedi. Bul stadıon úshin rekordtyq kórsetkish bolady.

Týr besinshi stýdııalyq albom Arirang-tyń shyǵýyna oraı uıymdastyrylyp otyr. Albom 20 naýryzda jaryq kórmek. Sol kezeńde Seýlde BTS The City Arirang Seoul mádenı jobasy ótedi: medıa-art, qalalyq ınstallıatsııalar jáne mýzykalyq baǵdarlamalardan turatyn serııalyq is-sharalar 20 naýryzdan 1 sáýirge deıin josparlanǵan.

Buǵan deıin BTS tobynyń ánshileri 2020 jyldyń úzdik ártisteri atanǵanyn jazǵanbyz.