Netanıahý «Hezbollaǵa» soqqy jasaýdy buıyrdy
ASTANA. KAZINFORM – Izraıl Premer-mınıstri Bınıamın Netanıahý «Hezbollanyń» Lıvandaǵy nysandaryna batyl túrde shabýyl jasaýdy buıyrdy, dep habarlaıdy BBC.
Izraıl armııasy ıslamshyl «Hezbolla» tobynyń jaýyngerleri atysty toqtatýǵa qaramastan, Lıvannyń ońtústigindegi Kantara aımaǵyndaǵy pozıtsııalaryna drondarmen shabýyl jasaǵanyn habarlady. Sonymen qatar armııa tankke qarsy zymyrandardyń qoımasyn taýyp, «15-ten astam terrorısti óltirdi».
Lıvanda Izraıl men «Hezbolla» arasyndaǵy qaqtyǵystar birneshe apta boıy jalǵasyp keledi. Munyń sebebi – shııttik toptyń ırandyq moldalarmen baılanysy. Tegeran rejımi kóptegen jyldar boıy «Hezbollany» qarý-jaraqpen jáne qarajatpen qoldap keledi.Osylaısha onyń Lıvanda «memleket ishindegi memleketke» aınalýyna yqpal etti.
AQSh pen Izraıldiń Iranǵa shabýylynan keıin «Hezbolla» qaqtyǵysqa óz odaqtasynyń jaǵynda kirdi. Sodan beri ol Izraılge únemi zymyran atyp keledi. Qazirgi ýaqytta atysty toqtatý týraly kelisim kúshinde. AQSh prezıdenti Donald Tramp jaqynda kelisimdi úsh aptaǵa uzartqanyn jarııalady. Degenmen shaǵyn qaqtyǵystar jalǵasty. Endi soǵys órti qaıtadan tutanýy múmkin.
AQSh tarapynan áli eshqandaı reaktsııa bolǵan joq. Buǵan deıin Pákistandaǵy beıbitshilik kelissózderi týraly jańalyq paıda bolyp edi. Alaıda Iran delegatsııasy ketip qaldy. Al amerıkalyq delegatsııa múldem kelmedi.
Sondyqtan qazirgi ýaqytta Iranmen qaqtyǵystyń qalaı órbıtini belgisiz. Soǵys bastalǵannan beri álemdegi munaıdyń shamamen besten biri ótetin Ormýz buǵazy áli kúnge deıin jabyq kúıinde qalyp otyr.
