Bitimgerlik operatsııalar ortalyǵynda kapıtan Qudabaevqa arnalǵan eskertkish ashyldy
Qorǵanys mınıstrliginiń Bitimgerlik operatsııalar ortalyǵynda beıbitshilik pen qaýipsizdik jolynda ómirin qıǵan ofıtser kapıtan Qaırat Qudabaevqa arnalǵan eskertkishtiń saltanatty ashylý rásimi ótti.
Monýment Almaty oblysyndaǵy Nurǵısa Tilendıev aýyly mańynda ornalasqan «Bitimger» oqý ortalyǵynyń aýmaǵyna ornatyldy. Kapıtan Qudabaev – Iraktaǵy bitimgerlik mıssııany oryndaý kezinde qaza tapqan qazaqstandyq jalǵyz áskerı qyzmetshi.
2005 jylǵy 9 qańtarda Vasıt provıntsııasynda oq-dárilerdi evakýatsııalaý operatsııasy barysynda jarylys boldy. Ol óz ómirin qurban etip, qarýlas dostaryn aman alyp qaldy. Kórsetken erligi men janqııarlyǵy úshin oǵan I dárejeli «Aıbyn» ordeni (qaıtys bolǵannan keıin) jáne birqatar halyqaralyq marapattar berildi.
Saltanatty rásimge Bitimgerlik operatsııalar ortalyǵynyń basshylyǵy, Qazaqstan Respýblıkasy jaýyngerlik is-qımyldar ardagerleri odaǵynyń ókilderi, áriptesteri men Qaırattyń týystary qatysty. Qatysýshylar batyrdyń rýhyna bir mınýt únsizdikpen taǵzym etip, eskertkishke gúl shoqtaryn qoıdy.
Saltanatty bólimnen keıin qonaqtar Bitimger mýzeıine bardy. Onda kapıtan Qaırat Qudabaevqa arnalǵan arnaıy ekspozıtsııalyq burysh jasalǵan. Munda onyń jeke zattary, fotosýretteri, marapattary, qyzmeti men erligi jaıly baıandaıtyn muraǵattyq materıaldar jınaqtalǵan.
– Búgin Qaırat aramyzdan ketkenine týra 20 jyl tolyp otyr. Biz onyń kúlimsiregen júzin, meıirimdiligin, aınalasyna syılaǵan jylýlyǵyn umytpaımyz. Onyń bul dúnıeden ketýi – otbasymyz úshin, ásirese anamyz úshin aýyr soqqy boldy. Qaharmandy qurmettep, onyń erligin umyt qaldyrmaǵany úshin Jaýyngerlik is-qımyldar ardagerleri odaǵy men Ortalyq basshylyǵyna shyn júrekten alǵysymyzdy bildiremiz, – dedi batyrdyń aǵasy Baýyrjan Qudabaev.
Saltanatty shara barysynda eskertkishtiń ornatylýyna belsendi atsalysqan Ortalyqtyń áskerı qyzmetshilerine Ardagerler odaǵy atynan estelik medaldar tabystaldy.
Kapıtan Qaırat Qudabaevtyń esimi – erlik, ar-namys pen antyna adaldyqtyń sımvoly retinde qazaqstandyq bitimgerlik tarıhyna máńgilikke jazyldy.
Aıta ketelik Golan jotalarynan elge 38 bitimger oralǵan edi.