Bitimgerlerdiń úshinshi quramy Golan jotasyna attandy
ALMATY. KAZINFORM — Almatydaǵy Desanttyq-shabýyldaý áskerleriniń 61993 áskerı bóliminde «Birikken Ulttar Uıymynyń bólinýdi baqylaý jónindegi kúshteri» mıssııasy quramynda qyzmet etý úshin Golan jotalaryna attanatyn úshinshi ulttyq bitimgerlik kontıngentti saltanatty túrde shyǵaryp salý rásimi ótti.
Іs-sharaǵa Qorǵanys mınıstrliginiń basshylyǵy, Bitimgerlik operatsııalar ortalyǵynyń qolbasshylyǵy, qyzmettester, Qarýly kúshterdiń ardagerleri, sondaı-aq áskerı qyzmetshilerdiń týystary men jaqyndary qatysty. Mıtıngte sóz alǵan Qorǵanys mınıstriniń tárbıe jáne ıdeologııalyq jumys jónindegi orynbasary general-maıor Asqar Mustabekov Qazaqstannyń halyqaralyq qaýipsizdikti qoldaý isine qatysýynyń mańyzdylyǵyna toqtaldy.
– Bitimgerlik syrtqy saıasattyń basym baǵyttarynyń biri jáne Qazaqstannyń halyqaralyq qaýipsizdikke qosqan mańyzdy úlesi bolyp tabylady. Sizder elimizdiń abyroıyn asqaqtatyp, Birikken Ulttar Uıymynyń bitimgerlik mıssııasyna qatysýǵa attanǵaly tursyzdar. Bul – memlekettiń, halyqaralyq qaýymdastyq pen jaqyndaryńyzdyń aldyndaǵy úlken jaýapkershilik, – dep atap ótti general-maıor Asqar Mustabekov.
Óz kezeginde ekinshi bitimgerlik kontıngentiniń áskerı qyzmetshisi 3-synyp serjant Jandos Áýbákirovtiń ákesi Ǵumar Maratuly sóz alyp, bitimgerlerge aq jol tilep, mıssııany abyroımen atqaryp, aman-esen elge oralýlaryna tilektestik bildirdi.
Budan soń úshinshi bitimgerlik kontıngenttiń komandıri podpolkovnık Іlııas Almatov bastaǵan áskerıler platsta saltanatty sappen júrip ótti. Osy mezetten Qarýly kúshterdiń 139 áskerı qyzmetshisi ekinshi kontıngentti aýystyrý úshin Almaty halyqaralyq áýejaıyna jol tartyp ketti.
Qazirgi tańda 150-den astam qazaqstandyq bitimger Birikken Ulttar Uıymynyń Taıaý Shyǵystaǵy jáne Afrıka kontınentindegi 7 mıssııasyna áskerı baqylaýshy, shtabtyq ofıtser jáne jeke derbes áskerı kontıngent retinde qatysyp jatyr. Atap aıtsaq, Lıvanda, Sırııada, Batys Saharada, Ońtústik Sýdanda, Kongo Demokratııalyq Respýblıkasynda, Ortalyq Afrıka Respýblıkasyndaǵy BUU mıssııalarynda qazaqstandyq bitimgerler bar.
Qazaqstandyq bitimgerler atysty toqtatý rejımin qamtamasyz etý, patrýldeý, tosqaýyl beketterin kúzetý, jarylys qaýpi bar zattardy joıý, sondaı-aq BUU personaldaryn alyp júrý men evakýatsııalaý jónindegi mindetterdi oryndaıdy. Ulttyq kontıngenttiń buǵan deıingi eki quramy Golan jotalarynda qyzmet etken kezde qoıylǵan barlyq mindetterdi oıdaǵydaı oryndap, BUU mıssııasy men Hatshylyǵynyń basshylyǵynan joǵary baǵa alǵanyn aıta ketý kerek.
Aıta ketelik Qazaqstandyq bitimgerler Golan jotalarynda 90-nan astam turǵynǵa medıtsınalyq kómek kórsetken edi.
