Bitimgerlerdiń halyqaralyq mıssııaǵa daıyndyq barysy tekserildi
ASTANA. KAZINFORM – Qorǵanys mınıstriniń tárbıe jáne ıdeologııalyq jumys jónindegi orynbasary vıtse-admıral Serik Borambaev Almaty garnızonyna jumys sapary barysynda «Bitimger» oqý ortalyǵy men Qorǵanys mınıstrligine qarasty bilim berý mekemelerinde boldy.
Sapar aıasynda vıtse-admıral Birikken Ulttar Uıymy mıssııasy aıasynda tapsyrmalardy oryndaýǵa daıyndalyp jatqan úshinshi qazaqstandyq birikken bitimgershilik kontıngentiniń daıarlyq barysymen tanysty.
Qorǵanys mınıstrliginiń ókili oqý ortalyǵynyń materıaldyq-tehnıkalyq bazasyn, sondaı-aq bitimgerlerdiń sapaly daıyndyq júrgizýine arnalǵan turmystyq jaǵdaılardy aralap kórdi.
«Bitimger» oqý ortalyǵyndaǵy saltanatty sap túzeý barysynda Serik Borambaev qazaqstandyq bitimgerlerdiń halyqaralyq qaýipsizdikti nyǵaıtýdaǵy jáne eldiń álemdik arenadaǵy bedelin arttyrýdaǵy mańyzdy rólin atap ótti.
— Birikken Ulttar Uıymy týy astyndaǵy bitimgershilik operatsııalarǵa qatysý — bul jahandyq turaqtylyqqa qosylǵan úles qana emes, sonymen qatar Qazaqstannyń álemdik qaýymdastyq aldyndaǵy jaýapty ári senimdi seriktes ekenin dáleldeıdi, — dedi vıtse-admıral.
Sol kúni Qorǵanys mınıstriniń orynbasary Radıoelektronıka jáne baılanys áskerı-ınjenerlik ınstıtýtynda jáne Baýyrjan Momyshuly atyndaǵy áskerı-sport kolledjinde boldy. Ol oqý oryndarynyń materıaldyq-tehnıkalyq bazasymen, oqý protsesin uıymdastyrý jáne kýrsanttar men sarbazdardyń kazarmadaǵy turmys jaǵdaılarymen tanysty.
Instıtýtta Serik Borambaev akademııalyq utqyrlyq bólimi men konstrýktorlyq bıýronyń jumysymen tanysyp, professor-oqytýshylar quramy men kýrsanttardyń birlesip júzege asyryp jatqan ǵylymı-zertteý jáne jobalyq jumystaryn kórdi. Keıbir ǵylymı ázirlemeler qazirdiń ózinde Qarýly Kúshterdiń bólimshelerinde qoldanylýda.
Sapar qorytyndysy boıynsha Qorǵanys mınıstriniń orynbasary áskerı ujymdardaǵy moraldyq-psıhologııalyq ahýaldy nyǵaıtý, áskerı-patrıottyq tárbıe men mádenı-demalys jumysyn jetildirý boıynsha birqatar tapsyrmalar berdi.
Aıta ketelik Ulttyq ulanda alǵash ret «aǵa sarbazdar» ınstıtýty engizildi.