Bitimgerlerdi Qazaqstanǵa qaıtarý sheshimin kim qabyldaıdy
ASTANA. KAZINFORM – QR Qorǵanys mınıstriniń birinshi orynbasary Sultan Qamaletdınov bitimgerlerdi Qazaqstanǵa qaıtarý tártibine qatysty túsinik berdi.
Búgin Senatta tilshiler Golan jotalaryndaǵy qazaqstandyq bitimgerlerdi elge qaıtarý sheshimin kim qabyldaıtynyn surady. Óz kezeginde Sultan Qamaletdınov bul suraqty BUU Bas hatshysyna joldaý kerek ekenin aıtty.
- Atap aıtqanda, bul kontıngent BUU hatshylyǵyna baǵynady. Olardy evakýatsııalaý nemese basqa jerge kóshirý máselelerin BUU hatshylyǵy men osyǵan tikeleı jaýapty qolbasshy sheshedi, - dedi QR Qorǵanys mınıstriniń birinshi orynbasary.
Eske salsaq, 2024 jyly naýryz aıynda qazaqstandyq bitimgerlerdi Golan bıigine shyǵaryp salý rásimi ótti.
Buǵan deıin habarlanǵandaı, BUU Qazaqstanǵa bitimgerlik mıssııaǵa jylyna 5 mln dollar tólem jasaıdy.
Budan bólek, Golan jotalarynan oralǵan qazaqstandyq bitimgerler qyzmetin qaıda jalǵastyratyny málim boldy.