Bitik jáne Jalpaqtal sý qoımalaryn salý jobalary memlekettik saraptamadan oń qorytyndy aldy

2026 jylǵy vegetatsııa kezeńinde fılıal sý tutynýshylarmen 307 kelisimshart jasasty. Onyń ishinde 205 kelisimshart boıynsha 10,7 myń gektar egistik alqaptarǵa, lımandar men jaıylymdarǵa 41,4 mln tekshe metr sý berý kózdelgen. Al tirek gıdrotehnıkalyq qurylystar arqyly sýarý úshin 102 kelisimshart jasaldy. Bul rette berilgen sý kólemi 10,1 mln tekshe metr, sýarylǵan jer kólemi 2 092,7 gektar boldy.

– Fılıal Kırov sý qoımasyn rekonstrýktsııalaý jáne Mamaev gıdrotorabyna kúrdeli jóndeý jumystaryn aıaqtady. Jánibek magıstraldyq kanalyn jáne Jaıyqbaı kanalyn rekonstrýktsııalaý jumystary bastaldy. Bitik jáne Jalpaqtal sý qoımalaryn salý jobalary boıynsha memlekettik saraptamanyń oń qorytyndysy alyndy. Dóńgelek jáne Pıatımar sý qoımalaryn rekonstrýktsııalaý jobalary memlekettik saraptamadan ótip jatyr, – dedi «Qazsýshar» RMK Batys Qazaqstan fılıaly dırektorynyń mindetin atqarýshy Danııar Halın. 

Jyl basynan beri oblysta jalpy uzyndyǵy 145 shaqyrym bolatyn kanaldarǵa mehanıkalyq tazalaý jumystary júrgizildi. Sondaı-aq 11 gıdrotehnıkalyq nysanda jóndeý jumystary aıaqtaldy. «Sýdyń qara naryǵyna» qarsy kúres aıasynda sý resýrstaryn zańsyz paıdalanýdyń 14 faktisi anyqtaldy. Quqyq buzýshylarǵa jalpy somasy 2,5 mln teńge aıyppul salyndy.

Sý resýrstary jáne ırrıgatsııa mınıstrligi málimetinshe, 2026 jylǵa arnalǵan sý únemdeý tehnologııalaryn engizý jospary 100% oryndaldy.

Aldyn ala málimet boıynsha, qazirgi ýaqytta oblysta zamanaýı sýarý júıeleri qoldanylatyn sýarmaly jerlerdiń kólemi 12,8 myń gektardy quraıdy. Bul oblystaǵy sýarmaly jerlerdiń jalpy kóleminiń 97%-yna teń.

Batys Qazaqstan oblysynda Jalpaqtal sý qoımasyn salý týraly usynysty senator Erbolat Muqaev jasaǵan edi.