BTA salymshylarynyń aqshasyna Ábilıazov jeke ushaqtar satyp alǵan

ASTANA. QazAqparat - Almaty qalasynyń qylmystyq ister boıynsha mamandandyrylǵan aýdanaralyq sotynda bankır Muhtar Ábilıazovtyń isi qaralýda. Búgingi sot otyrysynda zardab shegýshi taraptyń ókili - BTA banktiń qylmystyq isterdi júrgizý basqarmasynyń sarapshysy Talǵat Amantaı sóz sóıledi.

Baıandaý barysynda Ábilıazov pen onyń sybaılastary BTA bank salymshylarynyń qarajattaryn qalaı jymqyrǵandaryn, ony jeke maqsattarǵa qalaı paıdalanǵandaryn aıtyp berdi.

Onyń sózinshe, qymbat úsh jeke ushaq satyp alynǵan. Nátıjesinde, 54,6 mıllıon AQSh dollary qoldy bolǵan.

Tergeýdiń anyqtaǵanyndaı, 2005 jyly Ábilıazov «SEERIA Alliance LTD» offshorlyq kompanııasyna ıelik etedi. Keıin osy kompanııanyń ókilderi retinde banktan úlken kólemde qaryz alýǵa ótinish tastaıdy. Sodan soń, Ábilıazovtyń tapsyrmasymen nesıe komıtetiniń músheleri kompanııaǵa nesıe berý týraly qujatqa qol qoıady. Nátıjesinde «Sırııa Alıans» kompanııasyna zańsyz túrde birneshe márte mıllıondaǵan qarajat qaryzǵa berilgen.

Oǵan kepilge satyp alynǵan jeke ushaqtar qoıylypty. Keıin ol soıaǵa almastyryldy. Keıbir nesıeler tipti esh múlikti kepilge qoımastan alynǵan. Basqasha aıtqanda, tergeýdiń anyqtaǵanyndaı, ushaqtar bank salymshylarynan qarajatty jymqyrý úshin satyp alynǵan.

«2008 jyly 10 sáýirde nesıe komıtetiniń músheleri, qylmystyq toptyń quramynda bola tura, Ábilıazov bastaǵan uıymdasqan qylmystyq topqa jáne bankpen erekshe qarym-qatynasta bolǵan tulǵalarǵa qoldaý jasaı otyryp, «Sırııa Alıans» kompanııasynyń ruqsatynsyz 2,280 mıllıon dollar qaryz berý týraly vızaǵa qol qoıdy», - dep túsindirdi Talǵat Amantaı.

2005 jyldyń qazan aıynda «SEERIA Alliance LTD» kompanııasynyń esepshotyna taǵy 6 mıllıon AQSh dollary baǵyttalǵan. Degenmen 2006 jyly beriletin nesıe kólemi arta tústi. Banktiń nesıe bólimshesi qujattardy qoldan jasap, «SEERIA Alliance LTD» kompanııasyna mıllıondaǵan dollarǵa nesıelik qarajat aýdarǵan.

Onyń ústine, Ábilıazov qylmystyq oıyn júzege asyrý maqsatynda «SEERIA Alliance LTD» kompanııasymen arada bank úshin tıimsiz kelisimshart daıyndaǵan.

Jekeleı toqtalsaq, bankke áýe reısterin uıymdastyrý jáne bank qyzmetkerlerin tasymaldaý boıynsha qyzmet kórsetý kelisimsharty jasalypty. 2007 jyly aı saıyn bank sol qyzmetter úshin 70 mıllıon teńge tólep kelgen. Atalmysh kelisimshart negizinde áýe kompanııasynyń shotyna 2007 jyly 922 mıllıon teńge, 2008 jyly 1 mlrd teńge baǵyttalǵan. Ábilıazov qyzmetti óziniń kompanııasy arqyly satyp alyp otyrǵan jáne sol arqyly BTA bank salymshylaryn tonap kelgen.