«BTA ıpoteka» boryshkerlerge arnalǵan jeńildikter baǵdarlamasyn jalǵastyrady

Bul týraly búgin Almatyda baspasóz máslıhatyn ótkizgen kompanııa basshylyǵy málim etti, dep habarlaıdy QazAqparat.

Kompanııanyń prezıdenti Saǵyndyq Qusaıynovtyń aıtýynsha, ótken jyly kompanııa tarapynan boryshkerlerge tólem merzimin shegerý, nesıeleý merizimin uzartý, jeńildik merzimin usyný, memlekettik baǵdarlama aıasynda qaıta qarjylandyrý, úıdi jaldaý syndy jeńildikter usynylǵan. Bunyń nátıjesinde problemaly nesıe qorjynynyń úlesi 4 paıyzǵa azaıyp, jalpy nesıe qorjynynyń 18 paıyzyn quraǵan. Sondaı-aq ótken jyly 19 mıllıard teńgelik ıpotekalyq qaryz boıynsha 2 myńnan astam boryshkerdiń qaryzyn qaıtarý keıinge qaldyrylǵan. 5 mıllıard teńgeden astam mólsherdegi nesıesi boıynsha ústemaqy alynyp tastalǵan. Sonymen qatar kompanııa tarapynan Jyljymaıtyn múlikter áleýmettik qory qurylǵan. Bul baǵdarlama ıpotekalyq nesıesi jalǵyz úımen qamtamasyz etilgen, tólem qabileti tómen, 1,2 top múgedekteri men kópbalaly otbasylarǵa arnalǵan. Baǵdarlama boıynsha boryshker úıdiń kommýnaldyq aqysyn ǵana tólep, 18 aı tegin turý múmkindigine ıe.

«Biz nesıe tóleýge qatysty qıyndyqqa kezikken kez-kelgen tutynýshyǵa atalǵan baǵdarlamalar aıasynda kómek kórsetýge daıynbyz. Bul baǵdarlamalar bıyl da jalǵasyn tabady», deıdi Saǵyndyq Qusaıynov.