«BTA Bankten» iri mólsherde aqsha urlady dep aıyptalǵan E. Qosaev Qazaqstanǵa ákelindi

ASTANA. QazAqparat - Qazaqstan Respýblıkasy Bas prokýratýrasynyń Erlan Qosaevty qylmystyq jaýapkershilikke tartý úshin berý týraly suraýyn Reseı Federatsııasynyń Bas prokýratýrasy qanaǵattandyrdy.

Ol senip tapsyrylǵan bótenniń múlkin ıelenip alý jáne ysyrap etý, sondaı-aq qylmystyq jolmen alynǵan aqshany zańdastyrý úshin Qazaqstan Respýblıkasy Qylmystyq Kodeksiniń 176-babynyń 3-bóliminiń «a», «b»-tarmaqtary, 193-babynyń 3-bóliminiń «b», «v»-tarmaqtary boıynsha qylmystyq jaýapkershilikke tartylatyn bolady. Bul týraly Qazaqstan Respýblıkasy Bas prokýratýrasynyń baspasóz qyzmeti habarlady.

«Qylmystyq qýdalaý organy E.Qosaevty 2005 jyldan 2008 jylǵa deıingi aralyqta uıymdasqan qylmystyq toptyń quramynda áreket ete otyryp, «BTA Bank» AQ-nyń aqshalaı qarajatyn iri mólsherde urlaǵany, keıinnen olardy zańdastyrǵany úshin aıyptaýda.

Qylmys jasaǵan soń Qosaev qylmystyq qýdalaý organdarynan jasyrynyp júrdi, sondyqtan birneshe jyl memleketaralyq izdeýde boldy. Ony reseılik quqyq qorǵaý organdary Brıansk qalasynda ustady.

Eki eldiń Bas prokýratýralarynyń jaqsy jolǵa qoıylǵan jumysynyń jáne tıimdi ózara is-qımylynyń nátıjesinde Qosaevty Qazaqstanǵa berý týraly sheshim qabyldandy.

Búgin, 21 qyrkúıekte Respýblıka Bas Prokýrorynyń nusqaýy boıynsha quqyq qorǵaý organdarynyń qyzmetkerleri Qosaevty Reseıden Qazaqstan aýmaǵyna alyp keldi jáne ol Astana qalasynyń ýaqytsha ustaý abaqtysyna qamaldy», - dep jazylǵan habarlamada.

Qazirgi ýaqytta is boıynsha tergeý júrgizilýde.