BTA bank isi: Máskeýdegi bylyqtar jáne Ábilıazovtiń Grýzııa «sapary»
ASTANA. QazAqparat - Ábilıazov Máskeý oblysynan jer telimin satyp alýǵa qatysty qylmystyq kestesin sátti iske asyrǵan.
Máskeýdegi bylyqtar
2008 jyly onyń nusqaýymen «bir kúndik» maqsat úshin qurylǵan «Bervich Holding Sarl» kompanııasyna 250 mıllıon AQSh dollary kóleminde nesıe beriledi. BTA banktiń nesıe komıteti «Bervich Holding Sarl» kompanııasynyń nesıelik ótimin eshqandaı kedergisiz maquldaıdy. Nesıeniń maqsaty - Reseı Federatsııasynyń Máskeý oblysyndaǵy Mytışın aýdanyndaǵy kottedjder qalashyǵyn salýdy qarjylandyrý dep kórsetedi.
Vırgın araldarynda ornalasqan kompanııa Máskeý mańyndaǵy kottedjder qalashyǵyn qarjylandyrady degenniń ózi aqylǵa syımaıdy. Biraq «Bervich Holding Sarl» kompanııasyna mıllıondaǵan nesıelerdi bererde bank qyzmetkerleri eshteńege basyn qatyrmaǵan. Sonymen qatar, nesıe komıtetiniń músheleriniń eshqaısysy qaryz alýshynyń ókili retinde kórsetilgen Lıýksembýrgtegi áldebir Manacor atty myrzamen baılanys ornatpaǵan. Tergeýdiń boljamynsha, mundaı adam ómirde joq.
Týra osyǵan uqsas kestemen Muhtar Ábilıazov «Highbond Associated LTD» offshorlyq kompanııasyna da nesıe berý arqyly BTA bankten taǵy da 110 mıllıonnan astam AQSh dollaryn jymqyrypty. Buǵan deıingi epızodtan bir ǵana aıyrmashylyǵy, bul joly nesıeniń maqsaty Reseı Federatsııasynyń Máskeý oblysyndaǵy Domodedovo aýdanynan jer telimin satyp alýǵa «Rýsskaıa nedvıjımost» JAQ-yn qarjylandyrýǵa jumsalady dep kórsetilgen.
Ábilıazovtiń Grýzııa «sapary»
Jalpy alǵanda, grýzındik jobalardyń nátıjesinde Ábilıazov pen onyń sybaılastary 300 mıllıon AQSh dollaryn urlaǵany málim boldy. Bul jolǵy qarjylyq quıtyrqylyqtar Ábilıazovtiń burynǵy qylmystyq kestesimen iske asyrylǵan. Áýeli «bir kúndik» kompanııanyń atyna qujattar daıyndalady, keıinirek nesıe jelisi ashylady. 2007 jyly «Medea Hotel Company B.V.» kompanııasynyń atynan «Medeıa» qonaq úıiniń qurylysyna jáne aınalymdaǵy qarajatty tolyqtyrý úshin 42,5 mıllıon AQSh dollary kólemindegi nesıelik jeli ashylady. Banktiń nesıe komıteti bul somany 69 mıllıon dollarǵa deıin ósiredi. Aqsha urlanady, biraq eshqandaı qonaq úı salynbaıdy.
Ábilıazov Grýzııanyń birikken telekommýnıkatsııalyq kompanııasynyń jarǵylyq kapıtalynyń úlesin satyp alý degen jeleýmen BTA bankten 125 mıllıon dollar jymqyrǵan. Árıne bul jobalarmen de shektelmegen. Az ýaqyttyń ishinde taǵy da bes jobany qarjylandyrady. «Geogia tourists B.V.» kompanııasy jer telimderin satyp alý úshin 3 mıllıon AQSh dollaryn nesıege alady. Batýmı qalasynda «Meshetı» qonaq úı-turǵyn úı keshenin salýǵa «Kolhida Invest B.V.» kompanııasyna týra 4 mıllıon AQSh dollary berilgen. Sondaı-aq, «Tbilisi Hotel Holding B.V.» kompanııasyna Grýzııada jyljymaıtyn múlik satyp alý maqsatymen 56 mıllıon dollar nesıe berilgen. Budan bólek «Batumi Rivera B.V.» kompanııasyna jer ýchaskesin satyp alýǵa jáne nysandardy jartylaı salýǵa 10 mıllıon AQSh dollary kóleminde nesıe aýdarylady.
Sóz túıini
«BTA bank isi» boıynsha sybaılas jemqorlyqqa qarsy qyzmet organy 8 jyl boıy úzdiksiz tergeý júrgizdi. Sot organy eki aıdan astam ýaqyt osy qylmystyq isti búge-shigesine deıin qarady. Búgin 2 224 tomnan turatyn «BTA bank isine» núkte qoıyldy. Ádiletti sot Ábilıazov pen onyń sybaılastarynan birdeı tártippen 151 mıllıard 453 mıllıon 415 myń teńge óndirip alýǵa qaýly shyǵardy. Bul - Ábilıazovtiń qylmystyq qaýymdastyǵynyń qurbany bolǵan halyqaralyq qarjy ınstıtýttary men qarapaıym salymshylardyń qaıtqan qarajaty. «Qaıtqan malda qaıyr bar» deıdi halqymyz.
