BTA bank Hrapýnov pen Ábilıazovqa qarsy sotta jeńiske jetkenin málimdedi
ASTANA. KAZINFORM – BTA bank pen Almaty qalasynyń ákimi AQSh-ta Ábilıazovpen istes bolǵan Felıks Satterge qarsy ótken sotta jeńiske jetti. Banktiń baspasóz qyzmeti osyndaı aqparat taratty.
Banktiń resmı málimetine sensek, Nıý-Iorktiń ońtústik okrýgi boıynsha AQSh ońtústik okrýgtik sotynyń qazylar alqasy BTA bank pen Almaty ákimdiginiń paıdasyna 32 mln dollardan astam ótem taǵaıyndaǵan.
Úsh aptaǵa sozylǵan sot protsesinde tórt er adam men bes áıel adamnan turatyn qazylar alqasy Felıks Satter, Bayrock Group Inc., Global Habitat Solutions pen MeM Energy Partners LLC bastamashy bolǵan sot isinde BTA bank paıdasyna sheshim shyǵarǵan. Naqtyraq aıtsaq, BTA bank pen Almaty ákimdigin F.Satterdiń áreketterinen zardap shegýshi dep tanyǵan. Al F.Satterdiń áreketterin múlikti zańsyz ıemdený, negizsiz baıý jáne aqsha alý sııaqty zańsyzdyqtar dep tanydy. Osyny negizge alyp, shyǵyndy óteýge qajet dep suraǵan somadan artyq kólemde ótemaqy taǵaıyndady. Bul ótemaqynyń jalpy somasy 32 mln dollardan asady. Sot otyrysyn AQSh-tyń Nıý-Iorktegi orkýgtik sotynyń qurmetti sýdıasy Djon G. Koeltl júrgizgen.
2024 jyldyń 10 maýsymynda bastalǵan sot protsesi kezinde Muhtar Ábilıazov BTA bankte laýazymyn asyra paıdalanyp, mıllıardtaǵan dollar kóleminde jalǵan nesıeler bergeni aıtyldy. Aıyptaýshy tarap bul áreketter banktiń kúıreýine ákelgenin, oǵan deıin bul bank Qazaqstanda kólemi boıynsha úshinshi úlken bank bolǵanyn alǵa tartqan.
Sot protsesi kezinde Almaty ákimdigi burynǵy qala basshysy Vıktor Hrapýnovtyń alaıaqtyq áreketterin dáleldeýge múmkindik berdi. Ol da laýazymyn asyra paıdalanyp, memleket menshigindegi jer telimderin qoldan arzandatylǵan baǵamen satqan. Al ol telimderdi satyp alǵan kompanııalar kóbinese jubaıynyń, keıde tipti Muhtar Ábilıazovtiń baqylaýynda bolǵan.
Sotta usynylǵan dálel materıaldary M.Ábilıazov pen V.Hrapýnovtyń jymqyrǵan aqshalaryn biriktirip ustaǵanyn kórsetedi. V.Hrapýnovtyń uly, M.Ábilıazovtiń kúıeý balasy Іlııa Hrapýnov osy aqshanyń bir bóligin «tazartyp», ashyq aınalymǵa shyǵaryp otyrǵan. Sol kezde 23-te bolǵan Іlııas Hrapýnov aqshany tazartyp, jylystatý úshin Felıks Satterdiń kómegine júginedi. Ol І.Hrapýnovqa 40 mln dollardy amerıkalyq aktıvterge salýǵa kóndirgen.
Qazylar alqasy Elvıra Hrapýnova men Іlııas Hrapýnovtyń ınvestıtsııaǵa salǵan aqshanyń negizgi kózi bolyp sanalatyn sýdıa Gennadıı Petelındi, Vıktor Hrapýnov pen Muhtar Ábilıazov tergedi.
Sot alqasy Satter men Mochkın esimdi ókilder M.Ábilıazov pen V.Hrapýnovtyń BTA bank pen Almaty ákimdiginen urlaǵan aqshasyn sanaly túrde jylystatyp otyrǵan. Qazylar alqasy Satterdiń qorǵaýshylary usynǵan qorǵaý derekterin qabyldamady.
— Amerıkalyq qazylar alqasy Muhtar Ábilıazovtiń BTA bankke qatysty alaıaqtyq áreketiniń jan-jaqty dálelderin qarap, onyń sybaılastaryna qatysty biraýyzdan úkim shyǵardy. Al Vıktor Hrapýnovtyń máselesi boıynsha Almaty ákimdiginiń paıdasyna biraýyzdan úkim shyǵardy. Amerıkanyń alqabıler sot júıesi halyqaralyq sot tóreliginiń altyn standarty bolyp esepteledi. Biz bul amerıkalyq qazylar alqasyna bultartpas dálelder usyna alǵanymyzdy maqtan tutamyz jáne BTA bank pen Almaty ákimdiginiń paıdasyna shyǵarylǵan úkimge, onyń ishinde Felıks Satterdiń áreketi boıynsha ótemaqy taǵaıyndalǵanyna óte qýanyshtymyz. Sot alqasyna biz usynǵan dálelderdi muqııat zerttegenine alǵys aıtamyz», - dedi Almaty ákimdigi men BTA bank advokaty, Boies Schiller Flexner LLP tóraǵasy ári basqarýshy seriktesi Metıý L. Shvarts.
