«BTA Bank» dırektorlar keńesiniń burynǵy múshesi E. Tátishev eshqaıda ketpeý týraly qolhatpen úıine jiberildi

Bul týraly QR Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasy) resmı ókili Murat Jumanbaı málimdedi.

«Ol (E. Tátishev - avtor) 16 sáýirde ustalǵan bolatyn, alaıda densaýlyǵyna jáne basqa da jaǵdaılarǵa baılanysty eshqaıda ketpeý týraly qolhatpen jiberildi. Qazir oǵan tergeý organyna kelip tirkelip turýy úshin arnaıy keste belgilengen. Qylmystyq isti tergeý jalǵasýda», - dep atap ótti M. Jumanbaı QazAqparat tilshisine bergen suhbatynda.

Esterińizge sala keteıik, 2012 jyldyń jeltoqsanynda «BTA Bank» AQ-nyń qarajatyn talan-tarajǵa salýǵa baılanysty qylmystyq istiń 1770 tomyn odan ári tergeý úshin Bas Prokýratýra Qarjy polıtsııasyna tapsyrǵan edi.

Budan burynyraqta ótken brıfıng barysynda Murat Jumanbaı tergeý-jedel toby atalǵan qylmystyq isti tergeý kezinde E. Tátishevtiń de qatystylyǵyn dáleldegenin aıtqan. Al 16 sáýirde E. Tátishev ustalyp, Almatydaǵy ýaqytsha ustaý oqshaýlaǵyshyna qamalǵan bolatyn.