«BTA Bank» AQ Frantsııa sotynyń Ábilázovti ekstradıtsııalaý týraly sheshimin quptaıdy
ASTANA. 9 qańtar. QazAqparat - Qazaqstannyń «BTA Bank» AQ Frantsııa sotynyń Ábilázovti ekstradıtsııalaý týraly sheshimin quptaıdy. Bul týraly atalmysh banktiń taratqan baspasóz baıanynda keltirilgen. Eske sala keteıik, Frantsııa soty beısenbi kúni eks-bankır Muhtar Ábilázovti Ýkraınaǵa ne bolmasa Reseıge ekstradıtsııalaý týraly sheshim qabyldap, negizinen basymdyq reseılik tarapqa beriletindigin jarııa etken bolatyn. Osylaısha, Frantsýz soty ótken jyldyń 12 jeltoqsanyndaǵy prokýratýranyń eki eldiń birine ekstradıtsııalaý týraly talabyna qoldaý bildirgen edi.
BTA Banki ókilderiniń aıtýynsha, bundaı sheshim kezinde basqarma tóraǵasy laýazymynda bolǵan Ábilázovtiń zańsyz ıelenip ketken 6 mlrd. dollarǵa jýyq qarajatty quraıtyn aktıvterin qaıtarýǵa senimdi arttyra túsedi. Bul rette BTA banktiń Londondaǵy zańger-keńesshisi, banktiń Hogan Lovells kompanııasyndaǵy áriptesi Krıs Hardman bylaı málimdeıdi: «Ábilázovti onyń birqatar alaıaqtyq isterine qatysty sot aldynda jaýap berýi úshin ekstradıtsııalaý týraly sheshim BTA Banktiń óz aktıvterin qaıtaryp alý maqsatyndaǵy jumsap jatqan kúsh-jigerine az bolsa da járdem bola alady. Sonymen qatar, ekstradıtsııa shyndyǵynda Ábilázovtiń quqyqqa qaıshy áreketteri arqyly zańsyz jolmen alǵan qarajattaryn odan ári «jylystatýyn» jalǵastyrýyna aıtarlyqtaı shekteý salady. Bul sondaı-aq, Ábilázovtiń saıası sebeptermen qýdalanyp otyrǵan tulǵa retindegi betperdesiniń negizsiz ekenin taǵy da aıǵaqtaıdy. Odan bar-joǵy BTA bank pen onyń kredıtorlarynan urlanyp áketilgen mıllıardtaǵan dollar úshin jaýap berý talap etilip otyr».
Al BTA Banktiń Frantsııadaǵy zańger-keńesshisi Antonın Levıdyń aıtýynsha, sottyń búgingi sheshimi Reseı men Ýkraına quqyq qorǵaý organdarynyń ekstradıtsııa týraly suraý salýynyń, sondaı-aq BTA Banktiń Ábilázovke qatysty talaptarynyń qısyndy bolǵanyn rastaı túsedi. «Frantsýz soty Ábilázovke qarsy aıypty ony ekstradıtsııalanýyn naqtylaý úshin jetkilikti túrde salmaqty dep sanap otyr. Bundaı sheshimge Ábilázov shaǵymdana ma, joq pa, onyń esh máni de bolmas. Óıtkeni, ondaı shaǵym tek protsessýaldyq máselelerdi ǵana qamtymaq jáne Ábilázovti ekstradıtsııalaý jaǵdaıyna nemese Banktegi urlanǵan mıllıardtarǵa qatysty iske qandaı da bir áseri bolmaıtyny belgili», - deıdi Antonın Levı.
Eske salsaq, BTA Banki Dırektorlar keńesiniń burynǵy basshysy, Qazaqstan azamaty M. Ábilázov 31 shilde kúni Frantsııada ustalǵan bolatyn. Bankırdi berýdi Reseı, Ýkraına jáne Qazaqstan quqyq qorǵaý organdary talap etken edi. Toqtala ketetin jaıt, Qazaqstan men Frantsııa arasynda ekstradıtsııalaý týraly kelisim joq.
