Bishkektiń birneshe aýdany jaryqsyz qaldy

ASTANA. KAZINFORM - Qyrǵyzstan astanasynyń birneshe aýdanynda jaryq óship qaldy, dep habarlaıdy Kazinform agenttiginiń tilshisi.

Turǵyn úıler, ákimshilik ǵımarattar, áleýmettik nysandar, halyqqa qyzmet kórsetý ortalyqtary jaryqsyz qaldy. Biraz ýaqyttan keıin Bishkektiń keıbir aýdandarynda elektr qýaty berile bastady.

Jergilikti BAQ qazaq-qyrǵyz shekarasyndaǵy «Aq-Jol» ótkizý beketinde elektr qýatynyń úzilýine baılanysty kólik keptelisi oryn alǵanyn habarlady.

Keıbir málimetterge qaraǵanda, elektr jelileri nysandarynyń birinde apat bolǵan. Energetıkter úzilis saldaryn joıý jumystaryn júrgizip jatyr.

Mamyr aıynyń sońynda Petropavlda 28 myń abonent birneshe saǵat boıy jaryqsyz qaldy.

Osyǵan deıin Qyrǵyzstanda turmystyq zorlyq jasaǵandar 14 kúnge qamalatyny týraly jazdyq.