Bishkektegi ShYU sammıti: tóraǵalyq Pákistanǵa ótti
ASTANA.KAZINFORM - Bishkektegi ShYU sammıtinen keıin Shanhaı yntymaqtastyq uıymynyń tóraǵalyǵyn Pákistanǵa berý týraly sheshim qabyldandy, dep habarlaıdy agenttiktiń menshikti tilshisi oqıǵa ornynan.
Qyrǵyzstannyń syrtqy ister mınıstri Jeenbek Kýlýbaev bul týraly jergilikti jáne halyqaralyq BAQ-qa arnalǵan baspasóz máslıhatynda málimdedi.
-Búgin ShYU-ǵa tóraǵalyq Pákistan Islam Respýblıkasyna ótedi. Biz pákistandyq áriptesterimizdi quttyqtaımyz jáne olarǵa sátti ári ónimdi tóraǵalyq tileımiz. Qyrǵyz Respýblıkasy qajetti kómek kórsetýge, sabaqtastyqty qamtamasyz etýge jáne basqa múshe memlekettermen birlesip, Bishkekte qabyldanǵan sheshimderdi júzege asyrýdy jalǵastyrýǵa daıyn, - dedi mınıstr.
ShYU Bas hatshysy Nurlan Ermekbaev Pákistan tóraǵalyǵynyń taqyryby belgilegenin aıtty: «Kózqarastan ınnovatsııaǵa: ınnovatsııa men órkendeýdi baılanystyrý».
-Pákistan Islam Respýblıkasynyń Lahor qalasy 2026–2027 jyldarǵa arnalǵan Shanhaı yntymaqtastyq uıymynyń týrızm jáne mádenı astanasy bolyp jarııalandy. Pákistan jaqyn arada óziniń tóraǵalyq josparyn usynady. Biz onyń Qyrǵyzstannyń tóraǵalyǵymen birdeı joǵary deńgeıde ótýin qamtamasyz etemiz, - dedi ol.
Sammıtke Qazaqstan Respýblıkasynyń Prezıdenti Qasym-Jomart Toqaev, Qyrǵyz Respýblıkasynyń Prezıdenti Sadyr Japarov, Belarýs Respýblıkasynyń Prezıdenti Aleksandr Lýkashenko, Úndistan Respýblıkasynyń Premer-Mınıstri Narendra Modı, Iran Islam Respýblıkasynyń Prezıdenti Masýd Pezeshkıan, Pákistan Islam Respýblıkasynyń Premer-Mınıstri Shahbaz Sharıf, Tájikstan Respýblıkasynyń Prezıdenti Emomalı Rahmon, Ózbekstan Respýblıkasynyń Prezıdenti Shavkat Mırzıeev, Qytaı Halyq Respýblıkasynyń Tóraǵasy Sı Tszınpın jáne Reseı Federatsııasynyń Prezıdenti Vladımır Pýtın qatysty.
Esterińizge sala keteıik, Shanhaı yntymaqtastyq uıymyna múshe memleketter basshylary keńesiniń 26-shy otyrysy 1 qyrkúıekte Qyrǵyzstan astanasynda ótip jatyr.
QR Prezıdenti Qasym-Jomart Toqaev Shanhaı yntymaqtastyq uıymyna múshe memleketter basshylary keńesiniń 26-shy otyrysyna jáne «ShYU Plıýs» otyrysyna qatysý úshin Bishkektegi «Yrys Ordo» kongress-holyna bardy.
Sondaı-aq, ShYU-ǵa múshe memleketter basshylary keńesiniń otyrysynda birqatar qujatqa qoıyldy.
