Bishkektegi ShYU sammıti: nendeı máseleler talqylanyp, qandaı sheshimder qabyldanady
ASTANA. KAZINFORM — 1 qyrkúıekte Qyrǵyzstan astanasynda Shanhaı yntymaqtastyq uıymyna múshe memleketter basshylary keńesiniń kezekti otyrysy ótedi. Sondaı-aq «ShYU plıýs» formatynda joǵary deńgeıdegi kezdesý uıymdastyrylady, dep habarlaıdy Kazinform agenttiginiń Bishkektegi menshikti tilshisi.
Іs-sharalarǵa Shanhaı yntymaqtastyq uıymyna múshe memleketterdiń basshylary men ókilderi, shaqyrylǵan elder jáne birqatar halyqaralyq uıymdardyń jetekshileri qatysady dep josparlanyp otyr.
Qandaı máseleler talqylanady
Memleket basshylary halyqaralyq jáne óńirlik kún tártibindegi ózekti máselelerdi, Uıymdy odan ári damytýdyń basym baǵyttaryn, sondaı-aq saıası, saýda-ekonomıkalyq, kólik-logıstıkalyq, tsıfrlyq, ekologııalyq jáne mádenı-gýmanıtarlyq salalardaǵy yntymaqtastyqty tereńdetý perspektıvalaryn talqylaıdy.
«ShYU plıýs» formatyndaǵy keńeıtilgen quramdaǵy joǵary deńgeıdegi kezdesýde BUU-nyń ortalyq úılestirýshi rólin jáne halyqaralyq quqyqty nyǵaıtý, sondaı-aq turaqty damýǵa járdemdesý jáne ózara tıimdi yntymaqtastyqty keńeıtý máseleleri boıynsha pikir almasý josparlanyp otyr.
Qandaı qujattarǵa qol qoıylady
Otyrys qorytyndysy boıynsha ShYU-nyń 25 jyldyǵyna arnalǵan Bishkek deklaratsııasyna, kópjaqty yntymaqtastyqty odan ári nyǵaıtýǵa jáne Uıym qyzmetin jetildirýge baǵyttalǵan qujattar men sheshimderge qol qoıylady. Sondaı-aq memleket basshylarynyń birqatar taqyryptyq málimdemeleri qabyldanady.
Aldaǵy sammıt Qyrǵyz Respýblıkasynyń ShYU-ǵa 2025-2026 jyldardaǵy tóraǵalyǵynyń qorytyndy is-sharasy bolmaq. Tóraǵalyq «ShYU-ǵa 25 jyl: beıbitshilik, damý jáne órkendeý jolyndaǵy ortaq maqsat» uranymen ótip jatyr.
Buǵan deıin BUU Bas hatshysy Antonıý Gýterrıshtiń Bishkekte ótetin ShYU sammıtine qatysatyny habarlanǵan edi.
Sondaı-aq 30 tamyzda QHR tóraǵasy Sı Tszınpın Qyrǵyzstan prezıdenti Sadyr Japarovtyń shaqyrýymen Qyrǵyzstanǵa memlekettik saparmen baratyny belgili boldy.
Shanhaı yntymaqtastyq uıymynyń sammıti men VI Dúnıejúzilik kóshpendiler oıyndaryna daıyndyq jáne olardy ótkizý kezeńinde elde qaýipsizdik sharalary kúsheıtiledi.
ShYU sammıti ótetin ýaqytta Bishkek turǵyndaryna qaladan ýaqytsha ketý týraly ótinish aıtyldy.
Qaýipsizdikti qamtamasyz etý jáne sammıt pen VI Dúnıejúzilik kóshpendiler oıyndary kezinde kólik júıesine túsetin júktemeni azaıtý maqsatynda 31 tamyz ben 1 qyrkúıekte Bishkektegi iri saýda ortalyqtary, bazarlar jáne resmı delegatsııalar júretin baǵyttardaǵy birqatar jerasty ótkeli jabylady.
Bishkek áýejaıynda ShYU sammıtine baılanysty reıster shekteledi.
Bishkekte ótetin ShYU sammıti men VI Dúnıejúzilik kóshpendiler oıyndary kezinde qoǵamdyq tártipti 15 myńnan astam tártip saqshysy qamtamasyz etedi.
