Bishkektegi Kemel Toqaev oqyǵan mektepke jazýshynyń esimi beriletin boldy
ASTANA. KAZINFORM — Bishkektegi № 33 mektepke bilim oshaǵynyń túlegi Kemel Toqaevtyń esimi beriletin boldy, dep habarlaıdy «Kaktýs.medıa».
Bul týraly Qyrǵyz respýblıkasy Prezıdentiniń baspasóz hatshysy Ashat Alagózov málim etti.
Atalǵan aqparatty Qyrǵyz respýblıkasy Prezıdentiniń keńesshisi Aslan Koıchıev te rastap, Facebook-tegi paraqshasynda jazba qaldyrdy.
— Prezıdent Sadyr Japarovtyń bastamasymen Qazaqstan Prezıdenti Qasym-Jomart Toqaevtyń ákesi Kemel Toqaevtyń esimi Bishkektegi mektep-gımnazııaǵa berildi. Kemel Toqaev — 1923 jyldyń 2 qazanynda Almaty oblysynyń Qaratal aýdanynda týǵan. Qazaq jazýshysy, qazaq prozasyndaǵy detektıv janrynyń negizin qalaýshy, — dedi ol.
Sadyr Japarovtyń Prezıdentiniń keńesshisi Kemel Toqaev pen atalǵan mektepti ne baılanystyratynyn bylaısha túsindiredi.
— Ujymdastyrý jyldarynda jáne sonyń sońyn ala kelgen asharshylyq kezeńinde Kemel Toqaevtyń otbasy týǵan otanyn tastap, qonys aýdarýǵa májbúr bolǵan jáne birneshe jyl sol Frýnze qalasynda (qazirgi Bishkek — red.) turǵan. Kemel Toqaev osy jerde otbasynan aıyryldy. Jetimder úıinde tárbıe aldy. Uly Otan soǵysy jyldarynda taǵdyr ony ekinshi márte Qyrǵyzstanǵa keltirdi. Frýnze qalasyndaǵy jaıaý ásker ýchılışesinde (qazirgi № 33 mektep-gımnazııa) bilim alyp, sol jerden maıdanǵa shaqyrtyldy, — deıdi Koıchıev.
Sonymen qatar, ol Qazaqstan Prezıdenti ákesi oqyǵan mektepke avtobýs syılaǵanyn eske salady.
— Ol jaýyngerlik erligi úshin «Sovet Odaǵynyń Batyry» ataǵyna usynyldy. Biraq qandaıda bir sebeptermen ol ataq buıyrmady. Jýyqta Qasym-Jomart Toqaev № 33 mektep-gımnazııaǵa avtobýs syılady. Bul syılyq soǵys qaharmandaryna, ákesi oqyǵan mektepke qurmet belgisi retinde tabystaldy. Sondaı-aq, osy mekteptiń úzdik túlekterine Almatydaǵy Q.Sátbaev ýnıversıtetinen aqysyz oqý úshin úsh oryn beriletini málim bolyp otyr, — deıdi Qyrǵyz Respýblıkasy Prezıdentiniń keńesshisi.
Buǵan deıin Kemel Toqaevtyń Bishkektegi aýyr balalyq shaǵy týraly jazǵan edik.